سانڊو ست رنگو، باغبان سانڊو

ست رنگو يا باغبان سانڊو Common Garden Lizard / Calotes versicolor /



هن سانڊي جو مٿو وڏو ۽ بيضوي ٿئي ٿو. اڳيون ڌڙ پوئين ڌڙ جي ڀيٽ ۾ ڪنهن حد تائين وڏو ٿئيس ٿو. پٺيءَ ۽ ڪنڌ تي ڪنڊيدار ڇِلر ٿينس ٿا. ٽنگون ۽ ٻانهون سنهيون پر مضبوط اٿس. پڇ ڊگهو ۽ گول اٿس. اڪثر وڻن جي ٽارين تي ويٺل يا هلندو نظر ايندو آهي، اَڪمڪڙ ۽ ٻيا جيت ڏاڍي شوق سان کائي ٿو. جيتوڻيڪ تيز ڊوڙڻ جي صلاحيت اٿس، ان هوندي به بازن ۽ نانگن جو شڪار ٿي ويندو آهي. پنهنجي انداز ۾ ڪافي محتاط لڳندو آهي ۽ ٽارين کي مضبوطيءَ سان جهلي ڪنڌ مٿي کڻي هلندو آهي ۽ پوءِ جسم جو رنگ بدلائيندو آهي، ڪنڌ هيٺ مٿي ڌوڻيندو ۽ گلو ڦوڪيندو آهي. ان جو عام رنگ سرمائي، ناسي يا پيلو ٿئي ٿو پر اهو پنهنجا رنگ بدلائي سائو ، ڪارو يا ڳاڙهو به ٿي سگهي ٿو. جڏهن نَر موج ۾ هوندو آهي تڏهن ان جي منڍي رنگ بدلائي ڳاڙهي ٿي ويندي آهي. ست رنگو سانڊو سڄي ڏکڻ اوڀر ايشيا ۾ عام آهي ۽ ميدانن، جابلو ڪنڌين ۽ باغن ۾ نظر ايندو آهي. مادي هڪ وقت ۾ 10کان25 تائين آنا ڏئي ٿي. هي ماحول: 3 جو سانڊو آهي.