لائيڪوڊان اسٽرائيٽس

لائيڪوڊان اسٽرائيٽس Golden Spotted Wolf snake / Lycodon striatus /



لائيڪوڊانَ جنس ننڍن، وچولي قد جي بي ضرر بلائن تي ٻڌل آهي، انهن کي عام طور وولف سنيڪس چئبو آهي. هنن بلائن جو مٿو چپٿرو، اکيون ننڍيون ۽ ڪاريون ٿين ٿيون جيڪي مشڪل سان نظر اينديون آهن. هيءَ بلا ڏاڍي ڦڙتيءَ سان ديوارن ۽ وڻن تي چڙهي سگهي ٿي. ان جنس جا تقريباّ 30 قسم آهن جن مان ٽي سنڌ ۾ آهن.



اسٽرائيٽس striatus جي جسم جي ڊيگهه 370 ملي ميٽر کان 425 ملي ميٽر (1.2 فٽ کان 1.5 فٽ) ۽ پڇ 55 کان 60 ملي ميٽر ٿئي ٿو. انجي وڌ ۾ وڌ ڊيگهه 430 ملي ميٽر ريڪارڊ ڪئي وئي آهي ان جو جسم نيراڻ مائل ڀورو ٿئي ٿو، جسم جي ٻنهي پاسي هلڪي پيلي ۽ اڇي چوڪڙي ۽ جسم تي اڇيون يا پيليون پاسيريون پٽيون ٿينديون اٿس. ان جون عادتون Common Wolf snake جهڙيون ئي آهن. هيءَ ننڍڙي ۽ سهڻي بلا قدرتي ماحول کان محروم ٿيندي پئي وڃي. هندستان، پاڪستان ۽ ايران کان سواءِ افغانستان ۾ به ٿئي ٿي.