پاڻيءَ واتڙيو

St. John’s Keelback / Xenochrophis sanctijohannis / Natrix sanctijohannis/

پاڻيءَ واتڙِيو:



هي نانگ عام ڪولوبر نانگن جو وصفون رکن ٿا پر سائنسدان ان تي اختلاف رکن ٿا، انڪري ان کي هڪ جدا جنس ’نئٽرِڪس‘ جو نالو ڏنو اٿائون. هن جنس جون بلائون گپراٺن علائقن ۾ هونديون آهن ۽ موقعو ملندي ئي بي ڌڙڪ پاڻيءَ ۾ لهي وينديون آهن. تلاءَ يا واهه جي هڪ ڪپر کان ٽٻي ڏينديون ته وڃي ٻئي ڪناري کان نڪرنديون. پاڻيءَ جي ڪنڌيءَ تي ڏرڙن ۾ رهنديون آهن. ڦڙتيليون ۽ مضبوط جسم جون ٿين ٿيون. رات ڏينهن سرگرم هونديون آهن. پاڻيءَ جي ويجهو ئي اس ۾ ويٺيون هونديون آهن. خوراڪ ۾ مڇيون ۽ ڏيڏر شامل اٿن.

مارچ کان مئي تائين 6 کان 10 آنا پاڻيءَ کان ٻاهر ڪنهن سوراخ يا ڏرڙ ۾ ڏينديون آهن جن مان جولاءِ کان آگسٽ تائين ٻچا ڦُٽي ايندا آهن. ان جنس جون ٻه بلائون سنڌ ۾ آهن. ’نئٽرِڪس سئنڪٽي جوهانس‘ اصل ۾ هماليائي نانگ آهي جيڪو سڄي سنڌ پنجاب ۾ لاڙ تائين ٿئي ٿو. ٻي جنس جو نالو Natrix tessellate آهي، جيڪا ايران، افغانستان، يورپ ۾ به پکڙيل آهي.