ڪَرنڊ، مِٽيائي

ڪَرنڊ، مِٽيائي Rough-Scaled Sand Boa / Gongylophis conicus/



هن بلا جي ڪل ڊيگهه اڌ ميٽر کان هڪ ميٽر (ڏيڍ فٽ کان 3.3 فٽ) تائين ٿي سگهي ٿي . پڇ تمام ننڍو يعني 30 کان 60 ملي ميٽر ٿيندو اٿس. هيءَ ريتيلي علائقي جي بلا آهي. ان جي جسم تي ارڙ وانگر بي ترتيب چٽ هوندا آهن. انڪري اڪثر جوڳي ان کي ’ازدها جو ٻچو‘ چئي ماڻهن کا انعام وٺڻ جي ڪوشش ڪندا آهن. هن بلا جي جسم جا سڀ ڇلر اڀاردار ۽ کهرا هوندا آهن. ان جو مٿو جسم کان نمايان هوندو آهي. ان جو جسم ٿلهڙو ۽ مضبوط ٿئي ٿو. پٺي هيڊي يا ڳاڙهاڻ مائل ميٽوڙي ٿئيس ٿي. جسم تي گـهرا ڀورا يا ڪاري رنگ جا وڏا بيڊولا چٽ اڪثر پاڻ ۾ مليل هوندا آهن. پيٽ هيڊاڻ يا اڇاڻ مائل ٿئيس ٿو جنهن تي به ڪڏهن ڪڏهن ننڍا چٽ هوندا آهن.

هيءَ بلا رات توڻي ڏينهن جو نڪري ٿي. خطري جي وقت جسم کي چپترو ڪري زمين تي بي حرڪت ليٽي پوندي آهي يا واريءَ ۾ گهڙي ويندي آهي، ڪڏهن ڪڏهن گول ٿي ويندي آهي. هي نانگ ٻُوڙن تي سولائيءَ سان چڙهي ويندو آهي پر عام طور تي واري ۾ لڪي ويهندو آهي ۽ فقط وات واريءَ کان ٻاهر رکندو آهي، جيئن ئي ڪو شڪار وجهه ۾ ايندو اٿس، ان کي هڪدم پڪڙي وٺندو آهي ۽ ارڙ وانگر ان کي پنهنجي جسم ۾ وڪوڙي ڇڏيندو آهي.

هيءَ چيڙاڪ بلا آهي، موقعو ملندي ئي چڪ پائيندي هي. اها زهريلي نه آهي پر ان جي چڪ سان زخم ۾ سور ٿيندو آهي. ڪرنڊ بلا سياري ۾ لڳ ڪندي آهي. اپريل کان جولاءِ تائين 6 کان 12 ٻچا ڏيندي آهي. هيءَ بلا سڄي هندستان، سري لنڪا ۽ پاڪستان ۾ فقط سنڌ ۾ ٿئي ٿي.