ڳوراهه چوڪڙيدار

چوڪڙيدار ڳوراهه Chequered Keelback /Xenochrophis piscator /



آبي ماحول جي هن بلا کي سنڌيءَ ۾ عام جام ’پاڻيءَ واتڙيو‘ چوندا آهن. هِنديءَ ۾ ’پاني ڪا سانپ‘ سڏبو آهي. ان کي لاڙ ۾ ’ڳوراهه‘ چوندا آهن. ڳوراهن جا به ٻه ٽي قسم آهن، چوڪڙيدار ڳوراهه جي وڌ وڌ ڊيگهه 1.48 ميٽر (4.10 فٽ) ريڪارڊ ڪئي وئي آهي پر اها عام طور تي 1.21 ميٽر کان مٿي نه هوندي آهي. هن ڳوراهه جو جسم گَـهرو سائو، تيز هيڊو يا مِٽيائون هوندو آهي، ڪڏهن ڪڏهن هلڪو ڳاڙهاڻ مائل ڀورو به ٿئي ٿو. جسم تي ڪارن چِٽن جون پنج قطارون ٿينديون اٿس جيڪي عام طور تي جوان ڳوراهن ۾ نمايان هونديون آهن ۽ پاڻ ۾ ملي ڪي پاسيريون پٽيون ٺاهينديون آهن. جسم جو پويون حصو يڪ رنگو ٿئي ٿو، اکين جي پويان ٻه ڪاريون ٽيڏيون پٽيون هونديون آهن، جيڪي وات کي ڇهنديون آهن. پيٽ اڇو ٿئيس ٿو.

طبيعت ۾ چڱي خارباز بلا آهي، وري وري حملو ڪندي آهي. ان جي چڪ سان تمام سخت سور ٿيندو آهي. ڳوراهه عام طور تي سياري ۾ نِستائي واري ننڊ ۾ هلي ويندي آهي. ڏيڏر ۽ مڇيون شڪار ڪري کائيندي آهي. مارچ اپريل ۾ ڍنڍ جي ڪناري تي ڪنهن محفوظ هنڌ تي 40 کان 80 آنا ڏيندي آهي. آنو 25 کان 30 ملي ميٽر ڊگهو ۽ 15 کان 18 ملي ميٽر گول ٿئي ٿو. ٻچا مئي کان جون ڌاري ڦُٽي پوندا آهن. هيءَ بلا تائيوان کان هندستان پاڪستان تائين جابلو ۽ ميداني علائقن جي ندين ۽ ڍنڍن ۾ ٿئي ٿي.