آرگائيروجينا فيسيوليٽس

آرگائيروجينا فيسيوليٽس/ Banded Racer / Argyrogena fasciolata

ڪولوبرنياءِ Colubrinae ذيلي ڪٽنب جي هن بلا جي هڪ وڏي سڃاڻپ اها آهي ته انهن جي هيٺين ڄاڙي مٿين ڄاڙيءَ ۾ دٻيل هوندي آهي. هن بلا جي ڊيگهه هڪ ميٽر کان 1.1 ميٽر (3.4 فٽ) تائين ٿئي ٿي ۽ پڇ 210 ملي ميٽر (8 کان 9 انچ) ٿئي ٿو. اکيون وڏيون ۽ ڪاريون اٿس.
هن بلا جو رنگ ڳاڙهاڻ مائل ڀورو مِٽيائون ٿئي ٿو ۽ ان جي ڇلرن جون پاڙون ڪاراڻ مائل هونديون آهن. عمر جي شروعاتي حصي ۾ جسم جي اڳئين حصي تي هلڪي مٽيائين رنگ جون آڏيون پٽيون ٿين ٿيون. جوانيءَ ۾ هيءَ بلا يڪ رنگي ٿي ويندي آهي، پيٽ هلڪو پيلو ٿيندو اٿس.
هيءَ جنس عام طور تي خشڪ علائقن ۾ هوندي آهي، جتي خشڪ گاهه جا ميدان، زمين نرم ۽ چؤگرد ڪوئن جا ٻر هجن. طبيعت ۾ ٽاهڙ آهي ۽ لڪل رهندي آهي. رات جو هوشيار هوندي آهي. شڪار کي پڪڙڻ کان پوءِ پنهنجي ٻر ۾ گهڙي ماريندي آهي. تمام خارباز آهي، ان حالت ۾ جسم کي ڦنڊائيندي ۽ وري وري حملو ڪندي آهي. مڇريل حالت ۾ چڪ به وجهندي آهي. جسم ڦنڊجڻ سان ڇلرن جو اندريون رنگ ظاهر ٿيندو آهي ۽ محسوس ايئن ٿيندو آهي ڄڻ بلا جو رنگ بدلجي رهيو هجي.
هيءَ جنس بنگلا ديش کان سري لنڪا ۽ سنڌ تائين رڪارڊ ڪئي وئي آهي.