آپريشن لاءِ خون جو ٻليدان ضروري هو؟

18 آگسٽ 1995ع
آپريشن لاءِ خون جو ٻليدان ضروري هو؟

سنڌ جي درياهي ٻيلن ۾ هڪ ڀيرو وري وڏي آپريشن جون خبرون ڇاپيون ويون آهن، ان کي .”فائنل رائونڊ“ به چيو ٿو وڇي. هن کان اڳ سنڌ جي ٻيلن جو ڪيترا ڀيرا گهيراءُ ٿيو ۽ ڪيترا وڏا آپريشن ٿيا؟ هاڻي ته اهو ياد رکڻ به مشڪل آهي. هن ڀيري آپريشن لاءِ ايجنسين جي پنج هزار اهلڪارن بابت ”ميدان ۾ لهڻ“ جي خبر ممڻاڻين جي ڳوٺ تي ڌاڙيلن جي ان قهري ڪارروائي کانپوءِ آئي آهي جڏهن 13 ڳوٺاڻا هڪ مهل شهيد ٿيا ۽ سندن ڪوس جون خبرون ملڪ جي ڪنڊ ڪڙڇ تائين پکڙجي ويون.
ڪالهه تائين ڌاڙيلن کي ڇوٽ هئي ۽ سنڌ جي ڪچي ۾ رهندڙ ڪهڙو ڳوٺاڻو آهي جيڪو نٿو ڄاڻي ته ڌاڙيلن کي هٿيار ڪير ڏيندو هو؟ قانون جا محافظ پاڻ ڌاڙيلن سان مليل رهيا آهن، چوڪين تان هٿيار وڪامجندا رهيا آهن ۽ اڄ به ايئن ٿي رهيو هوندو. اڄ تائين ڪهري گرانڊ آپريشن جي ذريعي ڪي چار پنج سو ڌاڙيل ماريا ويا آهن؟ حڪومت پاڻ اقرار ڪندي رهي آهي ته اڪثر پوليس عملدار پاڻ ڌاڙيلن جا سهڪاري آهن، گهڻئي مئل ڌاڙيل حاضر سروس سپاهي نڪتا آهن. اها ته روز روئڻ جي ڳالهه آهي پر هاڻي اوچتو ڇا ٿيو آهي جو 5000 اهلڪار پني عاقل کان ماتليءَ تائين سڀني ٻيلن جو گهيراءُ ڪري رهيا آهن؟
شايد اهو انڪري ٿيو آهي ته 13 ڳوٺاڻا هڪ وقت ۽ هڪ هنڌ 40-50 ڌاڙيلن جي بي رحمي جو شڪار ٿيا ۽ اخبارن ۾ پوليس فورس، قانون نافذ ڪندڙ ادارن ۽ حڪومت جي ڏاڍي بدنامي ٿي. ثابت ٿئي ٿو ته ڌاڙيلن جي خلاف وڏو آپريشن شروع ڪرائڻ لاءِ ٻه ڳالهيون ضروري آهن. پهرين اها ته ڌاڙيل هڪ ئي وقت گهٽ ۾ گهٽ 13 ڳوٺاڻا ضرور مارين ۽ ٻيو ته اخبارون ظلم جي خلاف ايڏي ڀرپور رپورٽنگ ڪن ۽ لکن جو انتظاميا ۽ حڪومتون بدنام ٿين. بس اهو بدناميءَ جو ڀؤ ئي آهي جيڪو پني عاقل کان ماتليءَ تائين وڏو آپريشن ڪرائي سگهي ٿو. ڌاڙيلن هڪ هڪ ڪري ڀلي ته هڪ هزار ڳوٺاڻا ماريا هجن ۽ اخبارن ڊبل ڪالم جون هڪ هزار ڀيرا خبرون به ڇاپيون هجن پر ان مان سرڪار کي ناموس يا بدنامي نه ملي. 13 ڳوٺاڻن جو بيدرديءَ سان مرڻ ”شرط اولين“ هو ڇاڪاڻ ته اها خبر شهه سرخين سان هر اخبار ۾ لڳي. سنڌ جي ماڻهن کي گهرجي ته اهي نه رڳو 13 شهيد ڳوٺاڻن کي دعا ڪن پر انهن ڌاڙيلن جا به ٿورا مڃين جو ايڏي بيدرديءَ ڏيکاري جو اخبارن سرخيون لڳايون ۽ سرڪار بدناميءَ کان بچڻ لاءِ 5000 جون ٻيلي ۾ لاهڻ تي مجبور ٿي! ڪاش هي رائونڊ سچ پچ فائنل رائونڊ ثابت ٿئي!