ابڙو اڪيڊمي Abro Academy
2020-11-05
داخلا نمبر 1009
عنوان اسڪول في لاءِ اسڪول ۾ پِنايل ٻار
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1243
داخلا جو حوالو:
هن داخلا جون تصويرون نه مليون
اسڪول في لاءِ اسڪول ۾ پِنايل ٻار
حڪومت جي تعليمي پاليسيءَ جو هڪ نتيجو اهو به نڪتو آهي ته جڏهن محرابپور جو هڪ ٻار اسڪول جي ماهوار في جيڪا فقط 10 رپيا آهن، ڀري نه سگهي ته هن جو استاد کيس ماري مرڻينگ ڪري ڇڏي. مارڻ کانپوءِ سڄي اسڪول مان في جمع ڪرڻ کاءِ کيس جهول کڻي پنائي، پر جڏهن پوءِ به في جمع نه ٿئي ته اسڪول مان ڪڍي ڇڏي. حيف آهي ان معاشري تي جنهن ۾ اسڪول جي حدن ۾ ڪنهن شاگرد جي صرف ان ڳالهه تي ايتري تذليل ٿئي جو هو 10 رپيا في ڀري نه سگهيو!
مئٽرڪ تائين مفت تعليم جو وعدو ته خدا ڄاڻي ڪهڙي ٽينڪ هيٺان چٿجي ويو؟ خبر ناهي ته آءِ ايم ايف ۽ ورلڊ بينڪ وارن هٿان اهو ڪم ٿيو يا اسان پاڻ ئي ان لائق نه آهيون جو پڙهڻ جو حق اسان وٽ به هجي! سڀ ڳالهيون پنهنجي جاءِ تي ! پر اهو ٻار هاڻي ڪٿي پڙهندو جنهن کي اسان جي استاد پنهنجن هٿن سان ڌڪا ڏيئي اسڪول مان ڪڍي ڇڏيو ۽ سندس معصوم ذهن تي اسڪول جو هڪ اهڙو تصور ڇاپي ڇڏيو جيڪو ڪنهن يتيم خاني ۽ ٿاڻي کان مختلف نه آهي! اسڪول مان بي عزت ٿي نڪتل هي ٻار جيڪو ممڪن آهي ته سڀاڻي سنڌ جو سٺي ۾ سٺو ذهن ثابت ٿئي ها، اڄ محرابپور جي گهٽين ۾ ويڳاڻو ٿي اهو ضرور سوچيندو هوندو ته، ”هيءَ دنيا منهنجي ناهي!“ جنهن ٻار کي اڄ دنيا مايوس ڪيو آهي معاشررو هن مان سڀاڻي ڪهڙي موت جي اميد رکي ٿو ۽ ڇو؟