اصيل نانگ جا قسم

اصيل نانگ : Cobra

جوڳين جي پنهنجي دنيا آهي. انهن موجب اصيل ڪارن نانگن جا ست قسم يا ڀائر آهن، هُو انهن جي تشريح يا درجيبندي ڪجهه هن ريت ڪن ٿا:

1 تخت نانگ: سڀني نانگن جو سرتاج آهي. هن نانگ جو رنگ سونهري، جسم شيشي جهڙو چمڪدار آهي، جنهن جي آرپار نظر پوي ٿي. سونهري لڪيرن سان خوبصور ڦڻ هوندو اٿس. ڳچيءَ ۾ قدرتي ڳانو اٿس. جهنگ ۽ ويرانن ۾ چانڊوڪي رات جو تخت نانگ جي روايتي ڪچهري لڳندي آهي. ان کي بخت جو بادشاهه سمجهيو ويندو آهي (شايد هيءُ King Cobra ڏانهن اشارو آهي ڇاڪاڻ ته ان جو رنگ سونهري هوندو آهي).

2 پدم نانگ: 5 فٽ ڊگهو، ڪارو ناسي، وڏي ڦڻ ٿئيس ٿي جنهن تي علي سائينءَ جي دلدل جي کر جو نشان هوندو آهي. هي سنڌ ۾ عام آهي (هي Naja naja آهي). هڪ اڇو پدم هوندو آهي، جنهن جي مٿي تي مانڌاڻيءَ جي گل جهڙو نشان ٿئي ٿو. پدم نانگ جي پڇ ۾ زهريلو ڪنڊو هوندوآهي. هڪ ناسي پدم هوندو آهي.

3 واسينگ نانگ: جنهن کي پڇ ۾ ڪنڊو ٿيندوآهي، هي ڊگهو ۽ ڪارو ٿئي ٿو.

4 شيش نانگ: جيڪو ويرانن يا کنڊرن ۾ خزاني تي ويٺل هوندو آهي.

5 ڪاريهر نانگ: جيڪو درويش نانگ آهي ۽ قاتل جو عڪس اکين ۾ وٺندو آهي (ڪاريهر Black Cobra/ Naja oxiana آهي، باقي ڳالهيون ڏند ڪٿائون آهن).

6 اِڇاڌاري نانگ: جيڪو پنهنجي مرضيءَ سان انساني روپ وٺي سگهندو آهي، مٿي تي اڇو ٽِڪو ٿيندو اٿس. ڪارو ناسي ۽ گـهرو نيرو ٿيندو آهي (هي شايد Naja kaouthia آهي).

7 ڪلها ڌاري:

8 گڊو نانگ: هن جو پيٽ سليٽي ٿيندو آهي. پدم جي نسل مان کريل؛ نانگ ۽ ڪوراڙ جي ميلاپ سان پيدا ٿيندو آهي، انهن مان تِليهر ۽ ڦَنيهر مشهور آهن (هي اشارو غلط طور وئينس نانگ ڏانهن آهي، نانگن ۽ بلائن جو غير جنس ۾ ميلاپ ٿيندو ئي ڪونه آهي، تِليهر Naja naja ئي آهي جنهن کي پدم به چون ٿا، ’ڦَنيهر ‘ معنيٰ ’ڦَڻ وارو‘ يعني، اهو به نانگ جو هڪ صفتي نالو آهي).