2020-11-06
داخلا نمبر 1251
عنوان امداد محمد شاهه – مل جي حدن ۾ قيد ماڻهو
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 32767
داخلا جو حوالو:
هن داخلا جون تصويرون نه مليون
8 مارچ 1996ع
امداد محمد شاهه – مل جي حدن ۾ قيد ماڻهو
سائين جي ايم سيد جي پٽ سيد امداد محمد شاهه کي ڪراچي ايئرپورٽ تي ٺيڪ ان وقت جهليو ويو جڏهن هو عالمي سطح تي سنڌين جو ڪيس پيش ڪرڻ لاءِ لنڊن وڃي رهيو هو. کيس فقط اهو چئي جهاز تي چڙهڻ کان روڪيو ويو ته سندس سالو ”ايگزٽ ڪنٽرول لسٽ“ تي چڙهيل آهي. سندس نالو ان لسٽ تي ڇو چڙهيل آهي ۽ ملڪ کان ٻاهر وڃڻ وارو حق ڇو معطل آهي؟ انهن سوالن جي ڪا به وضاحت سامهون نه آئي آهي. جڏهن سرڪار پاران ڪا وضاحت آڏو نه اچي ته پوءِ متاثر ڌر ۽ عوام کي حق آهي ته اهي پنهنجي ذهن موجب سبب سمجهڻ جي ڪوشش ڪن.
عام سمجهه موجب ايگزٽ ڪنٽرول لسٽ تي اهي ماڻهو چڙهيل هوندا آهن جيڪي ملڪ ۾ ٿيندڙ ڪنهن ڏوهه ۾ گهربل هجن يا اهو شڪ هجي ته اهي ماڻهو ملڪ کان ٻاهر وڃي ملڪ جي مفادن کي ڌڪ هڻڻ وارين سرگرمين ۾ حصو وٺندا. سيد امداد محمد شاهه جهڙي ماڻهوءَ لاءِ اهي ٻئي گمان سنڌي ماڻهن جي تصور کان ٻاهر آهن. ايم ڪيو ايم جا نامي گرامي اڳواڻ، جيڪي دهشتگرديءَ کي هٿي ڏيو بيٺا آهن ۽ ڏيهه پرڏيهه ۾ حڪومت پاڪستان کي ”ظلم جي حد ڪندڙ“ حڪومت قرار ڏيارڻ ۾ مصروف آهن ۽ انساني حقن جي حوالي سان ملڪ جي ساک کي ليڙون ليڙون ڪري سڄي دنيا ۾ نه رڳو اهو ته ملڪ تي چٿرون ڪرايون آهن پر دهشتگردن کي مظلوم قرار ڏيارڻ ۾ ڪامياب ٿي ويا آهن، وڏي آزاديءَ سان سڄي دنيا ۾ لنڊن کان آمريڪا تائين ”جيڪي چاهين ڪرڻ“ لاءِ آزاد آهن پر امداد شاهه ملڪ کان ٻاهر نٿو وڃي سگهي!
قيد خاني ۽ گهر ۾ ڪهڙو فرق هوندو آهي؟ گهر اهو هوندو آهي جنهن مان ماڻهو پنهنجي مرضيءَ سان اندر ٻاهر اچي وڃي سگهي! جڏهن امداد محمد شاهه تي ملڪ مان پنهنجي مرضيءَ سان ٻاهر وڃڻ جي پابندي لڳي ته ان جي معنيٰ اها ئي نڪري ٿي ته امداد محمد شاهه کي ملڪ جي حدن اندر قيد ڪيو ويو اهي ۽ هاڻي هو هڪ اهڙو قيدي آهي جيڪو هڪ وڏي قيد خاني ۾ پنهنجي خرچ تي قيد آهي.
سنڌ جا ماڻهو ڄاڻن ٿا ته سيد امداد محمد شاهه نه رڳو سنڌ جي ماڻهن کي قومي شعور ڏيندڙ رهبر جو پٽ آهي پر هو پاڻ به پارليامينٽري سياست ڪندڙ قوم پرست اڳواڻ آهي ۽ سنڌ اسيمبليءَ جو رڪن به رهي چڪو آهي. سندس ماضي بندوق واري سياست کان آجو رهيو آهي ۽ نه وري هن جي سياست ۽ لهجو اهڙو آهي جهڙو ڪنهن ”دهشتگرد“ جو ٿي سگهي ٿو. انڪري، سنڌ جا ماڻهو حڪومت کان اهو پڇڻ جو حق رکن ٿا ته آخر ڪهڙي ڪارڻ ايگزٽ ڪنٽرول لسٽ جي ذريعي ”ڀاڳين“ کي ملڪ ۾ قيد ڪيو ويو آهي جڏهن ته دهشتگردن جا دوست ان پابندي کان آجا آهن. جيڪڏهن اهي آجا نه آهن ته پوءِ ڪراچي ۽ لنڊن جي وچ ۾ ايڏا ڦيرا ڪيئن هڻي سگهيا آهن؟
جيئن ته سرڪار پاران امداد شاهه بابت ڪا به وضاحت ڪو نه آئي آهي تنهنڪري امداد محمد شاهه جو موقف وڌيڪ اهميت اختيار ڪري ٿو ته هن کي فقط ان ڪري ٻاهر وڃڻ کان جهليو ويو ته هو ٻاهر وڃي عالمي سطح تي سنڌين جو ڪيس پيش ڪري نه سگهي. سنڌين جو ڪيس وڙهندڙ هڪ ڪردار منور هاليپوٽو اڳ ئي اسلام آباد جي تهه خانن ۾ هڪ مهينو گذاري زوريءَ جلا وطن ٿي چڪو آهي. حڪومت پاڪستان جو سنڌي قوم پرستن ڏانهن هي رويو سمجهه کان ٻاهر آهي ڇاڪاڻ ته قومپرست ڪا به ”هٿياربند مزاحمت“ ڪو نه ڪري رهيا آهن. هو سنڌ جي حقن لاءِ ۽ پاڪستان جي وجود جي هڪ حصي جي انساني حقن لاءِ پر امن طريقي سان عام راءِ ٺاهي رهيا آهن ۽ ان زهريلي پرچار جو اثر ختم ڪرڻ جي ڪوشش ڪري رهيا آهن جيڪو سنڌ کي جهنم بڻائيندڙ تنظيم سڄي دنيا ۾ پکيڙيو آهي.