0000-00-00
داخلا نمبر 1734
عنوان انصاف جا بنيادي اصول بدلائڻ ڪھڙو انصاف آهي؟
شاخ سنڌ ڪيس
پڙهيو ويو 9711
داخلا جو حوالو:
هن داخلا جون تصويرون نه مليون
يگناهي ثابت ڪر ۽ ڳنڍيون کول!
جناب چيف جسٽس بہ دعوا ڪئي آهي تہ ”حڪومت جو ڪو بہ حڪم يا حلف ٻڌڻي کان روڪي نٿو سگهي.... فوجي قدم بابت مناسب وقت تي فيصلو ڪنداسين.... اعليٰ عدالتن وٽ اهو اختيار نہ آهي تہ اها آئيني معاملن جي پھلوءَ جو جائزو وٺي.“ جناب چيف جسٽس صاحب جيڪي چيو، خدا ڪري تہ اها ڳالھہ عمل ۾ بہ ايئن ئي هجي!
جناب چيف جسٽس جي بيان ۽ احتساب بيورو آرڊيننس ۾ ترميم وارن اسمن کي ملائي پڙهجي تہ جواب مونجهاري ۾ هليو وڃي ٿو. جناب چيف جسٽس کان هن موقعي تي پڇي سگهجي ٿو تہ، ”ماءِ لارڊ! احتساب آرڊيننس ۾ ترميم ڪيتري قدر انصاف جي اصولن مطابق آهي؟... ڇا سپريم ڪورٽ ان ترميم تي پاڻمرادو سوچي ان جي تشريح، تائيد يا اختلاف ڪندي؟“ اسان عام ماڻهو جن کي حڪمران طبقا ”نان سينس“ ۾ شامل ڪندا آهن. ڏاڍو منجهي پيا آهيون. مھرباني ڪري ان حڪم نامي جي وضاحت ڪئي وڃي. اسان وٽ ايترا پئسا بہ ڪو نہ آهن جو آئين ۽ قانون جو ڪو ماهر وڪيل ٻڌي سگهون ۽ درخواست دائر ڪري سگهون!
جناب اعليٰ! اسان احتساب جي حق ۾ آهيون. احتساب بالڪل ٿيڻ گهرجي. هر سطح تي ٿيڻ گهرجي ۽ جناب چيف ايگزيڪيوٽو جي واعدن تي ٺيڪ عمل ڪو نہ پيو ٿئي. هڪ تہ احتساب واري انصاف جي گهوڙي گاڏيءَ ۾ گاڏي اڳيان ۽ گهوڙو پوئتي ٻڌو ويو آهي ۽ ٻيو تہ مٿين سطح تي احتساب جو عمل مڪمل تہ ڇا. ٺيڪ طرح سان شروع ئي ڪو نہ ٿيو آهي تہ (ٻڌڻ ۾ پيو اچي تہ) مختياڪارن ۽ تپيدارن جو وارو بہ اچي پھتو آهي. ڪروڙين ۽ اربين رپين جو مقروض/باقيدار ۽ بدعنوان قومي ليٽرن جي لٽ جو باب اڃا ٺيڪ طرح ڪو نہ نبريو آهي تہ هڪدم ”ڪنڍي ذريعي چوريءَ“ جي صلاحيت جيترا ”ملڪ دشمن“ وڪڙ ۾ اچڻ وارا آهن. الله خير ڪري، خبر ناهي تہ انھن پتڪڙن چورن جو ڇا ٿيندو؟ ”ماءِ لارڊ! ڇا سچ پچ، هن ملڪ ۾ هاڻي سڀ ماڻهو ڪوٽ پائيندا؟“