ابڙو اڪيڊمي Abro Academy
2020-11-04
داخلا نمبر 951
عنوان اوائلي قربان گاهه يا تدفيني ٿلها
شاخ منڇر گورک گاج دنيا
پڙهيو ويو 1225
داخلا جو حوالو:
هن داخلا جون تصويرون نه مليون
اوائلي قربان گاهه يا تدفيني ٿلها
هن علائقي ۾ هڪ ٻيو منظر به ڳجهارت جهڙو آهي. ڇا اهو به قربانيءَ جي رسم جو ڪو تسلسل آهي؟ ان قبرستان جي ويجهو ئي ٻه قديم ٿلها (platforms) آهن، جن جي ڊيگهه ويڪر ۽ اوچائي هڪ جيتري آهي. هنن ٿلهن جو مقصد ڇا هو؟ ٻئي ٿلها هڪٻئي جي ويجهو (آمهون سامهون يا هڪ قطار ۾ نه) آهن. انهن جي ماپ 20 x 10 x 3 فٽ آهي. اهي اڏاوتون ڪنهن به طرح مسلمانن جون قبرون نٿيون لڳن، ڇو ته اهي ماپ ۾ تمام وڏيون ۽ ڪشاديون آهن. اهي بي ڊولن پٿري بلاڪن ۽ قدرتي جنبن سان جڙيل آهن. پٿر هڪٻئي مٿان سادي طرح اوساريا ويا آهن ۽ انهن ۾ ڪو به مسالو، گارو يا پلستر استعمال نه ٿيو آهي. ڇا اهي ڪنهن قسم جا قربانيءَ جا ٿلها (Altar tables) آهن يا تدفيني ٿلها (Cairn platform) آهن؟ اهي ڪنهن نه ڪنهن قسم جي مذهبي نوعيت جا محسوس ٿين ٿا. ڇا اهي آڳاٽي وقت ۾ لاشن جي نيڪال يا آخري رسمن جي لاءِ ڪم ايندا هئا؟ يا ماڳهي هي ڪن فقيرن جون اجتمائي قبرون آهن، جيڪي ترخانن ۽ مغلن هٿان راتاهن ۾ ماريا ويا؟ بدقسمتيءَ سان پراڻن لوڪن اهڙو ڪو نشان نه ڇڏيو آهي، جنهن سان هن ٿلهن بابت ڪا راءِ قائم ڪري سگهجي. اسان کي ڪو نه ڪو جواب ملي سگهي ٿو، جيڪڏهن آرڪيالاجيءَ جي اصولن موجب انهن کي کوليو وڃي. اهو تاريخ کان آڳاٽو به ٿي سگهي ٿو ۽ نه به، ڇو ته في الحال اسان وٽ ڪا ثابتي نه آهي. بهرحال، اسانکي ان جهڙا ڪي Cairn platform يورپ ۾ به نظر اچن ٿا. اسڪاٽلينڊ ۾ ڪيمسٽر Camster ماڳ تي هڪ نيو ليٿڪ تدفيني ماڳ دنيا ۾ مشهور آهي، ان جي ظاهري شڪل رحيم شاهه وٽ ٿلهن سان ڪجهه مشابهت رکي ٿي. اسڪاٽ لينڊ واري ڊگهي تدفيني بندوبست Platform Cairn بابت چيو وڃي ٿو ته اهو بنيادي طور ٻن حصن ۾ آهي ۽ گولائي دار سطح هئن. اولهه وارو اڀريل پليٽفارم شايد ان مقصد جو هو ته اتي مردي جون آخري رسمون ادا ڪيون ٿي ويون، ٻيو حصو تدفين جو آهي. اهو ماڳ 5000 سال قديم آهي. ان جي ڀيٽ ۾ نئه ڪُڪڙاڻي واري هن ماڳ بابت في الحال اسان کي کوٽائين جو انتظار ڪرڻو پوندو.