ابڙو اڪيڊمي Abro Academy
2020-11-05
داخلا نمبر 1091
عنوان ايمنسٽي انٽرنيشنل ساک وڃائي ڇڏي
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1131
داخلا جو حوالو:
هن داخلا جون تصويرون نه مليون
16 آڪٽوبر 1995ع
ايمنسٽي انٽرنيشنل ساک وڃائي ڇڏي
بروٽس جڏهن جيوليس سيزر کي ڪک ۾ خنجر هنيو تڏهن هن وٽ دليل هو ته هو روم کي بچائي رهيو آهي. هن روم کي بچائڻ لاءِ جيوليس سيزر کي ڇرو هنيو ته مرندڙ کي ويساهه ئي نٿي آيو ته ڪو بروٽس جهڙو سنگتي به ايئن ڪري سگهي ٿو. ايمنسٽي انٽرنيشنل وٽ ته ”روم“ جهڙو ڪو به دليل نه آهي. ڪراچيءَ ۾ دهشتگردن جي حمايت ڪري ايمنسٽي انٽرنيشنل ثابت ڪيو آهي ته ان کي اکيون ڪو نه آهن، نه کيس نڪ آهي ۽ نه وري حقيقتن کي پرکڻ لاءِ ڪو ماپو آهي. ايئن ٿو لڳي ته جيڪڏهن سنڌ جي ٻيلن ۾ لڪل ڌاڙيل اڄ ايمنسٽي انٽرنيسنل ڏانهن هڪ خط لکي اهو چون ته حڪومت ساڻن ظلم ڪري رهي آهي ۽ کين ڏاڍي وحشياڻي نموني چونڊي چونڊي ماري رهي آهي ۽ کين ڏاڍي وحشياڻي نموني چونڊي چونڊي ماري رهي آهي ۽ اسان مجبور ٿي ٻيلن ۾ لڪي ويا آهيون ته شايد ايمنسٽي انٽرنيسنل انهن کي به ”ضمير جا قيدي“ قرار ڏئي ڇڏيندي.
ايمنسٽي انٽرنيشنل نه رڳو سنڌ جي مظلوم ماڻهن ۽ جمهوري حقن لاءِ وڙهندڙ ڌرين جي ڪک ۾ بروٽس وانگر ڇرو هنيو آهي پر ان ويساهه ۽ ڀرم کي به ڇرو هنيو ويو آهي جيڪو ايمنسٽي انٽرنيشنل لاءِ ضمير جي قيدين جي دل ۾ هو. اها احتجاج ڪرڻ جي ڳالهه آهي ته اها عالمي تنظيم هڪ اهڙي دهشتگرد تنظيم جي وڪالت ڪري رهي آهي جنهن 10 مهينن جي عرصي760 ماڻهو قتل ڪيا آهن. ايمنسٽي انٽرنيشنل کي کپندو هو ته اها ايم ڪيو ايم جا پريس رليز پڙهڻ بدران ان جي ٽارچر سيلن ۾ ٺهيل ڦاهيون، سرڪڻون، انبور، ڪات، لوهي شيخون ۽ ڊرل مشينون ڏسي ها ۽ 760 بيگناهه ماڻهن جي گهرن ۾ وڃي پڇي ها ته قال ڪير آهن!
ايمنسٽي انٽرنيشنل پنهنجي ساک وڃائي ڇڏي آهي بلڪه دهشتگردن جي ساٿاري بڻجي وئي آهي. ان جون تازيون رپورٽون جيڪي ظاهر ظهور هڪ طريقي موقف تي ٻڌل آهن، پڙهڻ کانپوءِ سنڌ جا اهي سڀ ”ضمير جا قيدي“ شرمسار آهن جن کي ايمنسٽي انٽرنيشنل ضياءَ الحق جي ڪاري مارشل دوران اذيتون سهڻ جي موت ۾ ”ضمير جا قيدي“ قرار ڏنو هو.