ابڙو اڪيڊمي Abro Academy
2020-11-04
داخلا نمبر 948
عنوان بکر شهيد
شاخ منڇر گورک گاج دنيا
پڙهيو ويو 1199
داخلا جو حوالو:
بکر شهيد
بکر شهيد
هي مقبرو جوهي کان واهي پانڌيءَ واري رستي تي ست يا اٺ ڪلوميٽرن جي فاصلي تي روڊ لڳ اتر پاسي واقع آهي. هيءَ ديهه ۽ تپو بکر شهيد آهي. هن بزرگ جا ٻيا تفصيل نٿا ملن، البت سڀ هن کي شهيد سمجهن ٿا. ڪي ماڻهو هن کي پنهور، ڪي لُنڊ، ته ڪي رودناڻي سمجهن ٿا. عزيز ڪنگراڻي هِن لاءِ چانڊيو هجڻ جو شڪ ڏيکاري ٿو ڇاڪاڻ ته هن وقت سندس متولي چانڊيا آهن. پر ڪنهن وٽ ڪا به تصديق نه آهي. هي مقبرو پٽ سليمان جي ٻين مقبرن جهڙو ئي سادو آهي، يعني، چوڪنڊي عمارت کي جوڙڪُنڊن ذريعي اٺ ڪُنڊو ڳچ ڏيئي ان تي گنبذ رکيو ويو آهي. دروازو ڏکڻ ۾ اٿس. ديوارن کي هر طرف هيٺئين سطح تي پنج پنج عمودي ۽ مٿي ننڍا پانيل رکيا ويا آهن. چئني ڪنڊن تي هڪ هڪ ۽ پنجين نيل گنبذ جي مٿان رکي وئي آهي. هن مقبري ۾ به ٻنهي سطحن يعني ديوار ۽ ڳچ تي ڪنگريدار آرائش رکي وئي آهي.
بکي شهيد لاءِ به ايئن ئي سمجهيو وڃي ٿو ته هو به ميان وال تحريڪ جو هڪ ڪردار هو. روايت آهي ته” هڪ پوڙهي عورت جي ڳئون چوري ٿي وئي. اها عورت بکر فقير وٽ مد لاءِ آئي. هي فقير چورن جي پويان ويو ۽ چورن سان مزاحمت ۾ شهيد ٿي ويو. هي فقير به گهنور خان ۽ سليمان لُنڊ جو همعصر لڳي ٿو.