ابڙو اڪيڊمي Abro Academy
2020-11-05
داخلا نمبر 1079
عنوان جهاز اغوا ڪرڻ جي ڪوشش
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1175
داخلا جو حوالو:
هن داخلا جون تصويرون نه مليون
7 سيپٽمبر 1995ع
جهاز اغوا ڪرڻ جي ڪوشش
جيڪڏهن سريلنڪا جو جهاز ايم ڪيو ايم جي 13 دهشتگردن هٿان اغوا ٿي وڃي ها ته اهو سچ پچ ايترو ئي وڏو ڌماڪو هجي ها جيترو 1981ع ۾ ”الذوالفقار“ جي نالي ۾ ڪارچيءَ مان جهاز جي اغوا مهل ٿيو هو. هندستاني حڪومت يقينن ايم ڪيو ايم سان تعلق رکندڙ هاءِ جيڪرن جي ايتري ئي مدد ڪري ها جيتري ڪابل ۽ دمشق سرڪاري الذوالفقار جي ڪئي هئي. جهاز جي اغوا کان پوءِ مخصوص پريس ملڪي ۽ عالمي ادارن تان هاءِ جيڪرن کي هيرو ڪري پيش ڪري ها ۽ پاڪستان سرڪار تي دٻاءُ وڌو وڃي ها ته اها مسافرن جون زندگيون بچائڻ لاءِ انساني بنيادن تي سوچي ۽ هاءِ جيڪرن جا مطالبا قبول ڪري.
خبرن موجب ايم ڪيو ايم اهڙي رٿابندي ڪئي هئي پر ڳجن ادارن کي اڳواٽ خبر پئجي وئي ۽ هنن ڏوهارين کي ٺيڪ ان مهل جهليو جڏهن هو پنهنجي رٿا تي عمل ڪرڻ لاءِ جهاز ۾ چڙهي چڪا هئا ۽ چند منٽن کانپوءِ ايجنسين جي گرفت مان نڪري وڃن ها. اهو واقعو 4 آڪٽوبر تي رات جو پوڻي ٻي لڳي ان مهل ٿيو جڏهن ايئر لنڪا جي فلائٽ يو ايل 186 جي اڏامڻ ۾ باقي 20 منٽ هئا. آءِ بي، ايف آءِ اي ۽ ايئرپورٽ سيڪيورٽي فورس جهاز کي اغوا ٿيڻ کا بچائي پنهنجي سڄي عمر ۾ شايد اهو پهريون چڱو ڪم ڪيو آهي. هن کان اڳ ۾ پاڪستانين کي تجربو آهي ته اهي ادارا يا ته ننڊ پيا هوندا آهن يا وري واقعو ٿيڻ ڏيندا آهن ۽ پوءِ ويٺا ليڪو ڪٽيندا آهن. اخبارن تيرهن دهشتگردن جا نالا ولديتون ۽ ڏس پتا به ڇاپيا آهن ۽ ٻڌايو آهي ته اهي ڪراچيءَ جي سينٽرل ضلعي ۾ هڪ سئو کان مٿي خون ڪرڻ جو اعتراف به ڪري چڪا آهن.
هاءِ جيڪرن جيڪڏهن ڪامياب ٿي وڃن ها ته سندن مطالبا فقط ٻه هجن ها: ڪراچيءَ۾ جهليل دهشتگردن جي آزادي ۽ ڀارت ۾ سياسي پناهه. هاءِ جيڪنگ عالمي قانون ۾ هڪ وڏو ڏوهه آهي جنهن جي معافي ڪونهي پر اڪثرملڪ پنهنجي دشمن ملڪن لاءِ سوڙهه پيدا ڪرڻ لاءِ هاءِ جيڪرن جي مدد ڪندا آهن ۽ ان عمل کي سياسي رد عمل سڏي ڏوهارين کي پناهه به ڏيندا آهن. اهي ملڪ دهشتگرديءَ کي ”حقن جي جنگ“ قرار ڏيئي متاثر ملڪ خلاف ماحول ٺاهڻ لڳندا آهن.
حڪومت پاڪستان هنن ناڪام هاءِ جيڪرن سان ڪهڙو ورتا ڪندي؟ ان سوال جو جواب جلد ملي ويندو پر هڪ ڳالهه نوٽ ڪرڻ جي آهي ته پريس جو اهو حصو جيڪو مخصوص لساني تنظيم جو ترجمان بڻيل آهي، بنهه خاموش آهي. خميس ڏينهن واري هڪ شام جي اخبار اها خبر برابر ڏني پر پوءِ ڪنهن به اڙدو توڻي انگريزي اخبار ان واقعي جو نه ذڪر ڪيو ۽ نه وري ڪو فالو اپ ڏنو. ايئن ٿو لڳي ته ڄڻ کين هدايت ڪئي وئي آهي ته ان خبر جي حوالي سان مڪمل بليڪ آئوٽ ڪيو وڃي،. ايئن تڏهن ٿيندو آهي، جڏهن يا ته خبر بنهه ڪوڙي هجي يا وري اها تمام نازڪ هجي. هونئن اها به حيرت جي ڳالهه آهي ته ان مخصوص پريس ان واقعي کي يا حڪومت جي ان دعويٰ کي اڃا تائين غلط به قرار نه ڏنو آهي ته جهاز مان گرفتار ٿيل 13 ماڻهو هاءِ جيڪنگ جي نيت سان جهاز ۾ سوار ٿيا هئا.