جوهي لڳ ٻيا ٺلهه

جوهي لڳ ٻيا ٺلهه

جوهيءَ کان ڏکڻ ۾ شهر لڳ (جوهيءَ کان ڀان سيدآباد ويندڙ روڊ تي) تلاءَ جي ڪناري هڪ ٺلهه (شايد اسٽوپا) موجود هو. هي ڪافي اوچو ۽ ڪشادو ٺلهه هو. ان ٺلهه تي 1980ع واري ڏهاڪي جي شروع ۾ سيد نجف علي شاهه لڪياريءَ پنهنجي بيٺڪ ٺاهي ۽ ان کي 10 کان 15 فٽ ڊاهي هموار دڙي جو روپ ڏنو هو. هن کان پوءِ سندس پونئيرن اتي سيد نجف شاهه جي کٽ ۽ پڳ رکي ڇڏي آهي. هن وقت دڙي جي صورت ئي بدلجي وئي آهي، بس هڪ وڏو ٿَلهو ۽ ان تي هڪ عمارت بيٺل نظر اچي ٿي. ان ٿلهي تي چڙهڻ لاءِ موجود اڄوڪيون ڏاڪڻيون ٺيڪ اتي ئي آهن، جتي ان ٺلهه جون پراڻيون ڏاڪڻيون هيون. (هن ٺلهه تائين اسانجي رهنمائي عزيز ڪنگراڻيءَ ڪئي.

جوهي ٺلهه ـ2

جوهيءَ کان ٻه ڪلوميٽر ڏکڻ طرف ڀان سيدآباد ويندڙ روڊ جي اولهه پاسي هڪ ڳوٺ ۾ هڪ ڪچو ٺلهه بيٺل آهي. سرڪاري رڪارڊ ۾ ان ڳوٺ جو نالو ’ڪِنگراڻي‘ آهي پر هاڻي ڳوٺ گل محمد گنب سڏجي ٿو. هن وقت ان ٺلهه جا ٻه حصا باقي ڏسجن ٿا. مقامي ماڻهن ان ۾ ڪجهه ڦير گهير ڪئي آهي. ٺلهه جو اتر وارو چؤڪور حصو (زمين کان 10 فٽ مٿي) آهي، ان جي ڊيگهه ويڪر هن وقت 20X20 فٽ آهي. ان ٿلهي تي چڙهڻ لاءِ ڏاڪڻ اتر کان آهي. ڏکڻ پاسي هڪ گول ٺلهه (زمين کان 20 فٽ مٿي) ان سان جڙيل آهي جنهن تي چڙهڻ جو رستو اتر واري حصي تان آهي. هن وقت ٺلهه جي چؤڪور حصي تي ’هوتـُو مست‘ رستم فقير جي قبر آهي، جنهن لاءِ چون ٿا ته هو ٺلهه ٺاهيندو هو. هوتـُو مست جي قبر ويهين صديءَ جي پڇاڙيءَ جي ٺهي آهي