جوکم کانسواءِ ڪا ٻي واٽ نه هئي

جوکم کانسواءِ ڪا ٻي واٽ نه هئي

پنجاب ۾ جيڪو سياسي بحران اچڻو هو سو نيٺ آيو پر هي اهڙو بحران آهي جنهن سان خود پيپلز پارٽيءَ جي حڪومت جو وجود ڏڪي ويو. مسٽر وٽوءَ جون بد عوانيون، پيپلز پارٽيءَ خلاف اڳرايون ۽ ان لاءِ پيدا ڪيل سوڙهه ان حد تائين وڌي چڪي هئي جو لڳو ٿي پيپلز پارٽي بنهه ٻوساٽجي وڃي ها! ان کان اڳ جو پيپلز پارٽيءَ جو ساهه پنجاب ۾ ٻوساٽجي وڇي، سوچي سمجهي هڪ وڏو جوکم کنيو ويو ۽ وٽو حڪومت معطل ڪئي وئي.
ڪا به گاڏي هميشه سپر هاءِ وي تي، تيز ۽ لس نه هلندي آهي ۽ نه وري مند هميشه صاف هوندي آهي. سٺي مند ۾ ۽ بحران کان آجي حڪومت هلائڻ هر حاڪم جي خواهش هوندي آهي پر تڏهن ڇا ڪجي جڏهن مخالف قوتون بحران پيدا ڪري ڇڏين؟ ان کان ته ڪو انڪار نٿو ڪري ته وٽو هڪ اهڙو وڏو وزير هو، جنهن کان پيپلز پارٽي ته ٺهيو، خود سندس پارٽي مسلم ليگ (ج) به عاجز هئي. جيتوڻيڪ مسلم ليگ (ن) به کانئس خائف آهي تڏهن به مجبوريءَ وچان ساڻس اتحادي پئي ٿئي. اها ڀلي ته نواز شريف جي في الحال هڪ سياسي ضرورت هجي، اڳتي هلي اها حمايت خود نواز شريف کي ڳچيءَ ۾ پوڻي آهي.
في الوقت ٻئي ڌريون وڏيون دعوائون ڪري رهيون آهن ته اهي ئي نئين حڪومت ٺاهينديون. ڪن اخبارن لکيو آهي ته پنجاب ۾ في ميمبر هڪ ڪروڙ رپيا اگهه لڳي ويو آهي ۽ پيپلز پارٽيءَ پنهنجا ميمبر نواز شريف جي پهچ کان لڪائي ڇڏيا آهن. چوڌري شجاعت هارس ٽريڊنگ ڪرڻ کان انڪار ڪري رهيو آهي پر سياسي مبصر انڪار جي دعويٰ کي ”اقرار“ سمجهندا آهن. جيڪڏهن هارس ٽريڊنگ جو ڀو نه هجي ها ته سياسي پارٽيون پنهنجا رڪن لڪائينديون ڇو وتن ها؟
سٺي مند ۾ جوکم کڻڻ ڪو جوکم نه هوندو آهي ۽ نه وري ان کي قيادت چئبو جيڪا ڏکئي وقت جوکم کڻي ٻيڙو تار ڪرڻ کان ڊڄي وڃي. بينظير ڀٽو حڪومت ڏکئي وقت ۾ وڏو جوکم کنيو ۽ وٽو حڪومت کي ختم ڪيو ويو. هي ايڏو وڏو جوکم هيو جو نه رڳو پنجاب ۾ بازي ابتي ٿي پئي سگهي پر خود مرڪزي حڪومت به خطري ۾ پئجي وڃي ها. ماضيءَ ۾ نواز شريف جي صوبائي ۽ مرڪز ۾ پيپلز پارٽي حڪومت جو ٽڪراءُ اسان ڌسي چڪا آهيون، جنهن جي نتيج ۾ پيپلز پارٽي حڪومت کي حزب اختلاف ۾ وهڻو پيو هو.
پيپلز پارٽيءَجوکم کنيو ۽ وزيراعظم کي اهو بحران نبيرڻ لاءِ پاڻ لاهور ۾ رهڻو پيو. 9 سيپٽمبر تائين صورتحال پيپلز پارٽيءَ لاءِ ڏاڍي بهتر نظر آئي ۽ نظر آيو ته مسلم ليگ (ج) جو وڏو حصو اڃا به پي ڊي ايف ۾ بيٺو آهي. ان مرحلي تي محترمه ارادو ظاهر ڪيو ته ”پنجاب ۾ 18 سالن کانپوءِ هاڻي ٻيهر فري هينڊ حڪومت ٺاهي ويندي، اتحادين کي ڇڏيو نه ويندو آهي، جوڻيجو ليگ کي وزارتون ڏنيون وينديون ۽ وٽوءَ کي وڏو وزير ڪري آڻڻ تلخ تجربو هو.“ لڳي ٿو ته طوفان ڏينهن ٻن ۾ هڪ پاسي لڙهي ويندو ۽ ٻيڙو طوفان مان لنگهي پار پوندو. اها ٻي ڳالهه آهي ته ڪڏهن ڪڏهن ڪپتان جي معمولي غلطيءَ سبب يا اوچتو واءُ ڦرڻ ڪري جهاز ڪنڌيءَ ويجهو به ٻڏي پوندا آهن. وٽوءَ کي وزارت ڏيڻ جو تجربو ڪيترو تلخ ٿي سگهي ٿو؟ صدر فاروق لغاري چوي ٿو ته ”پنجاب ۾ بغاوت جي صورتحال پيدا ٿي وئي هئي.“
هوڏانهن عالمي بينڪ به تصديق ڪئي آهي ته معطل ٿيل وڏو وزير سوشل ايڪشن پروگرام ۾ وڏين بد عنوانين ۾ ملوث آهي. مسلم ليگ (ن) ۽ منظور وٽو ٻئي ڄڻا پ پ حڪومت کي مسلسل طور تي فاشسٽ حڪومت چئي رهيا آهن ۽ اسيمبليءَ جي اندر ۽ ٻاهر جنگ وڙهڻ جي ڳالهه ڪري رهيا آهن. ميان نواز شريف جي ته پراڻي دشمني آهي پر منظور وٽو ان حڪومت کي فاشسٽ چئي رهيو آهي، جنهن سان پاڻ ڊگهو وقت شامل رهيو آهي. ڪالهه تائين جيڪا حڪومت فاشسٽ ڪو نه هئي، اها اڄ فقط ان ڪري فاشسٽ ٿي وئي آهي جو منظور وٽيءَ لاءِ بدعنوانين جا رستا ۽ سندس حڪومت ختم ڪئي وئي آهي. عوام جو منظور وٽوءَ کان فقط هڪ ئي سوال آهي ته جيڪڏهن هو صاحب ايڏو ئي باضمير هو ۽ پيپلز پارٽي حڪومت ايڏي فاشسٽ هئي ته پوءِ هن معطل ٿيڻ تائين پاڻ استعيفيٰ پيش ڇو نه ڪئي؟