ابڙو اڪيڊمي Abro Academy
2020-11-04
داخلا نمبر 945
عنوان حاجي عارب لنڊ جي اَٺ دري قبي
شاخ منڇر گورک گاج دنيا
پڙهيو ويو 1189
داخلا جو حوالو:
حاجي عارب لنڊ جي اَٺ دري قبي
حاجي عارب لنڊ جي اَٺ دري قبي
حاجي عارب لنڊ جي اَٺ دري قبي
پٽ سليمان ۾ سڀ کان اهم نقاشي عارب لنڊ جي قبيءَ ۾ ٿيل آهي. هيءَ قبي قبرستان جي ڏکڻ اوڀر ڪنڊتي اهي ۽ اٺ دري آهي. چوڪور چبوتري تي هيءَ اٺڪنڊي عمارت، ان ۾ ٿيل نقاشيءَ سبب ڪاڇي جي عمارتن ۾ پنهنجي خاص جاءِ والاري ٿي گنبذ هيٺ فقط هڪ قبر آهي. گنبذ جي ڳچ تي اندرئين پاسي هر طرف جدا جدا منظر چٽيل آهي. هڪ تصوير ۾ گهوڙيسوار سورمو شينهن جو شڪار ڪندو نظر اچي ٿو، هو ڪميت گهوڙي تي سوار آهي، گهوڙو خوب سينگاريل آهي، شهسوار پنهنجو ڊگهو ڀالو شينهن کي ڇاتي ۾ کپيايو آهي، شينهن جو رت وهي رهيو آهي. گهوڙي جي پٺيءَ تي شينهن جي کل وڇايل آهي، شهسوار جي چيلهه سان تلوار به ٻڌل آهي ۽ مخروطي ٽوپ پاتل اٿس. ٻي تصوير ۾ ٿلهو متارو ڏنڀرو چٽيل آهي، جيڪا منڇر جي سڀ کان مقبول مڇي رهي آهي. ٽين تصوير ۾ هڪ مالدار شخص جي کٽ آهي، تصوير ڪجهه ڊهي چڪي آهي، جنهن ڪري پتو نه ٿو پوي ته کٽ تي ڪير ويٺل آهي؟ کٽ جي ٻنهي پاسي هڪ طرف ڪنڍي مينهن ۽ ٻئي پاسي ڪارو ڏاند ٻڌل آهي. چوٿين تصوير ۾ هڪ پالڪي نظر اچي ٿي جنهن جا ٻيا تفصيل ڊهي ويا آهن. پنجين تصوير ۾ هڪ همراهه ڪلهي تي جامڪي بندوق کڻي گهمندو نظر اچي رهيو آهي، چيلهه سان تلوار ٻڌل اٿس، مٿي تي مخروطي ٽوپي، جسم تي تنگ پاجامو ۽ راجستاني پڙو اٿس. ڇهين تصوير ۾ ٻه مور چنهبن سان هڪ نانگ سان ويڙهه ۾ مصروف آهن، ستين تصوير ۾ ڪجهه عورتون آهن پر اها تصوير بلڪل ڊٺل حالت ۾ آهي. اٺين تصوير ۾ انب چتيل آهن. گنبذ جو اندريون پاسو به گلدستن سان خوب چٽيل آهي.