ابڙو اڪيڊمي Abro Academy
2020-11-06
داخلا نمبر 1216
عنوان حواله ڪيس قسط 2 ڪڏهن رليز ٿيندي؟
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1106
داخلا جو حوالو:
هن داخلا جون تصويرون نه مليون
4 فيبروري 1996ع
حواله ڪيس قسط 2 ڪڏهن رليز ٿيندي؟
هندستان ۾ ”حواله ڪيس“ اسڪينڊل ڀارت کي لوڏي ڇڏيو آهي ۽ ساڄي ڌر جي وڏن وڏن پارسائن جون ٽوپيون لهي پيون آهن. ڪي ڏاڍا مڙس في الحال پنهنجيون ٽوپيون بچائي ويا آهن پر ڪيساتئين؟ حواله اسڪينڊل ۾ 115 ماڻهن جا نالا سامهون آيا آهن جن مان في الحال فقط 10 سياستدانن جي خلاف چارج شيٽ تيار ٿي آهي جن ۾ حڪومتي ڌر ۽ مخالف ڌر وارا چڱا مڙس سڀ شامل آهن. ٻيو ته ٺهيو بي جي پي جو لال ڪرشن آڏواڻي، اڳوڻو نائب وزيراعظم ديوي لال، ڀارتي لوڪ سڀا جا ميمبر ۽ اڳوڻا وزير به شامل آهن. حواله ڪيس ۾ نالو ته هاڻوڪي وزيراعظم نرسمهارائو جو به آهي پر هن تي چارج شيٽ نه هنئي وئي آهي.
”حواله ڪيس“ ڀارتي سياستدانن ۽ ڪامورن کي پرڏيهه مان هڪ ڳجهي ذريعي رستي وڏين رقمن جي فراهميءَ جو پڪو دستاويزي ثبوت اهي، جنهن جي ترديد ڪري نٿي سگهجي. هآني، ڀارتي سياستدان جيڪي صبح شام پنهنجي چڱي مڙسيءَ جا ڀاشن ڏيندا هئا، ”وٺجي“ ويا آهن. ڪو استعيفا ڏئي ساک بچائڻ جي ڪوشش پيو ڪري ته ڪو ان معاملي کي ”سياسي چال“ پيو سڏي ڇاڪاڻ ته جلد ئي هندستان ۾ چونڊون ٿين واريون آهن. اهو گورک ڌنڌو رڳو هندستان ۾ ڪو نه هلي، پاڪستان ۾ به اهو سلسلو زمان کان هلندڙ آهي.
1977ع ۾ جڏهن ڀٽي صاحب خلاف پاڪستان قومي اتحاد پاران تحريڪ هلائي وئي هئي تڏهن ڀٽي صاحب شڪايت ڪئي هئي ته ”حڪومت جي خلاف هلچل هلائڻ لاءِ آمريڪي ڊالرن جو سيلاب آيو آهي.“ اها ئي دانهن محترمه به ڪندي رهي آهي. پرڏيهي ناڻي پاڪستان ۾ چونڊيل حڪومتن جو تختو اونڌو ڪرڻ ۾ وڏو ڪردار ادا ڪيو آهي ۽ ان حقيقت کان هاڻوڪي حڪومت چڱي طرح باخبر آهي. ”حواله سسٽم“ جي ذريعي رڳو سياستدان ئي نه، الائي ته ڪهڙن ڪهڙن شعبن جا ڪامورا رقمون حاصل ڪن ٿا خود هندستان ۾ به حواله ڪيس جي جاچ ٽيم جو هڪ عملدار ”حواله ڪيس“ ۾ ملوث ڏٺو ويو ۽ پوءِ کيس رٽائر ڪيو ويو.
پاڪستان جي گهرو معاملن واري وزير نصير الله بابر هندستان جي ”حواله ڪيس“ جو پڙاڏو ٻڌڻ کانپوءِ چيو ته ”حواله ڪيس جي ٻي قسط جلد ئي پاڪستان ۾ رليز ٿيندي“ اها قسط ڪڏهن رليز ٿيندي؟ ڇا اها ”سينسر بورڊ“ جي هٿن مان گذاري ويندي؟ پاڪستان جي ماڻهن جي خواهش هوندي ته اها قسط جلد رليز ٿئي ۽ ان جو ڪو به حوالو ۽ ڪردار سينسر نه ٿئي ته جيئن هر اڳواڻ ۽ ڪاموري جو اصل چهرو عوام جي آڏو اچي. جيڪو ”منهن ۾ موسيٰ ۽ اندر ۾ ابليس“ آهي.