ابڙو اڪيڊمي Abro Academy
2020-11-05
داخلا نمبر 994
عنوان حيدرآباد: دهشتگرد ناڪام نه ٿيا آهن
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1236
داخلا جو حوالو:
هن داخلا جون تصويرون نه مليون
حيدرآباد: دهشتگرد ناڪام نه ٿيا آهن
في الحال اها دعوا ڪرڻ ته حيدرآباد ۾ رتوڇاڻ جي ڪوشش ناڪام ٿي وئي آهي، هڪ اٻهري فتوا آهي. هڪ پولٽري فارم تي ڇاپي دوران هڪ راڪيٽ لانچر، هينڊ ڪريڪر ۽ ڪجهه ڌماڪيدار مادو هٿ اچڻ کي ”وڏي ڪاميابي“ چئي نٿو سگهجي. حيدرآباد ۾ شهري ان کانپوءِ به سڄي رات ٻڪرا پڙي، گرونگر، فقير جي پر، پريٽ آباد، ريشم گلي، لياقت ڪالوني، ڪاموري موري، پڪي قلعي ۽ ڇوٽڪي گهٽي مان فائرنگ جو آواز ٻڌندا رهيا. هي شهر جا اهي بد قسمت پاڙا آهن جيڪي سنڌ جي پراڻن هنرمندن پنهنجي قوم لاءِ اڏيا پر هاڻي شايد ئي ڪو پراڻو سنڌي اتي موجود هجي يا پاڻ کي محفوظ مهسوس ڪندو هجي! جيڪڏهن ميان غلام شاهه ڪلهوڙي کي خبر هجي ها ته سن 1995ع تائين سنڌي ماڻهن کان اهو شهر کسجي ويندو ته شايد ان ڪم ۾ هٿ ئي نه وجهي ها. افسوس جو قلعي جي دروازي تي سندس خواهش تي لڳل اها دعا به قبول نه پئي جنهن ۾ آسمان واري کي اپيل ڪئي وئي هئي ته ”اي رب هي شهر امن امان ۾ رهي!“
حيدرآباد شهر جو ٽَڪر وارو علائقو توڻي لطيف اباد جڏهن سڄي رات فائرنگ سان گونجي ٿي تڏهن اها دعوا ڪيڏي نه فضول محسوس ٿئي ٿي جڏهن چيو وڃي ٿو ته حيدرآباد ۾ رتوڇاڻ جي ڪوشش ناڪام ٿي وئي آهي. ڇاڪاڻ ته پولٽري فارم مان هڪ راڪيٽ لانچر ۽ ڪجهه بارود هٿ ڪيو ويو آهي.
ايم ڪيو ايم (الطاف) جي بار بار رڙ پئي پوي ته ايم ڪيو ايم دهشتگرد تنظيم نه آهي ۽ اهي ڪي ٻيا آهن جيڪي ايم ڪيو ايم جي نالي ۾ دهشتگردي ڪري رهيا اهن. الطاف حسين جيڪڏهن سمجهائي سگهي ته اهو ضرور سمجهائي ته جيڪڏهن ڪو ٻيو سندن نالي ۾ دهشتگردي ڪري رهيو آهي ته پوءِ حيدرآباد جي ٽڪر واري علائقي ۽ لطيف آباد جي دانهن گهرن، پاڙن ۽ گهٽين مان ڪير ٿو فائرنگ ڪري جن ۾ ايم ڪيو ايم موجود آهي؟
حقيقت اها آهي ته ايم ڪيو ايم، مسلم ليگ ۽ ع ن پ گڏجي اها ڪوشش ڪري رهيون آهن ته وڳوڙن جو دائرو هاڻي ڪراچيءَ کان ٻاهر ٻين شهرن تائين وڌايو وڃي ته جيئن پيپلز پارٽيءَ جي حڪومت کي ڊاهڻ لاءِ فوج کي بهانو تيار ڪري ڏجي. ڪراچيءَ کانپوءِ حيدرآباد ايم ڪيو ايم جو ٻيو وڏو ڳڙهه آهي ۽ هاڻي جڏهن ڪراچيءَ ۾ رياستي ادارا دهشتگردن جي پويان ڀوت بڻجي ڪاهي پيا آهن، تڏهن دهشتگردن ڪراچي مان ڀاڄ کائي حيدرآباد، ميرپورخاص ۽ سکر سميت پنجاب جي انهن شهرن جو رخ ڪيو آهي جتي هنن لاءِ پناهه گاهون ۽ بدامني ڪرڻ جي گنجائش موجود آهي.
حيدرآباد پر امن شهر نه آهي. خوف ۾ وڪوڙيل حيدرآباد جو هر شهري محسوس ڪري ٿو ته اتي دهشتگردي ڪنهن به مهل جوالا مکيءَ وانگر ڦاٽ کائي سگهي ٿي ڇاڪاڻ ته حيدرآباد جا ڳتيل آبادين وارا اهي پاڙا هٿياربند آهن ۽ اهي ان حڪمت عمليءَ تي اڃا تائين هلي رهيا آهن. جيڪا هڪ ڀيرو اڳ ۾ ”قلعو آپريشن“ واري وقت ۾ آزمائي، ڪامياب ٿي چڪا آهن. ان ڪري اٻهرا بيان ۽ نتيجا ڪڍڻ جي ضرورت نه آهي ۽ نه وري ڪنهن خوش فهميءَ ۾ رهڻ جي ضرورت آهي. حيدرآباد مان هڪ راڪيٽ لانچر لڀجي پوڻ کي ”وڏو ذخيرو“ قرار ڏيڻ محض سستي بيان بازي آهي. حيدرآباد ۾ اهڙا هٿيار سَوَن جي تعداد ۾ ٿي سگهن ٿا.