ابڙو اڪيڊمي Abro Academy
2020-11-05
داخلا نمبر 1013
عنوان دهشتگردن جي موت تي ماتم
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1249
داخلا جو حوالو:
هن داخلا جون تصويرون نه مليون
30 آگسٽ 1995ع
دهشتگردن جي موت تي ماتم
دهشتگرد ارشد ڪي ٽو به مارجي ويو جنهن شخص ٻئي انسان جي قتل لاءِ هٿ ۾ بندوق کنئي هو ٽن منٽن کان ٽن سالن جي عرصي ۾ ڪڏهن به مري سگهي ٿو. کيس سمجهڻ گهرجي ته سندس عمر هاڻي وڌ ۾ وڌ ٽي سال وڃي بچي آهي. ارشد ڪي ٽو خوش قسمت هو جنهن روپوشيءَ ۾ پورا ٽي سال ڪاٽيا. سندس سر تي 10 لک رپيا انعام هو ۽ بيشمار خونريزين لاءِ جوابدار هو. لياقت آباد، سپر مارڪيٽ ۾ سنڌين جو قتلام به سندس کاتي ۾ آهي.
ڪي ٽوءَ جي موت کي ”قومي“ پريس اهڙي ته ڊرامائي صورت ۾ پيش ڪيو آهي، جو هر اهو ماڻهو، جنهن کي ڪراچيءَ جي سياست ۾ ڪي ٽوءَ جي ڪار گذاريءَ جي خبر نه هجي ايئن ئي سمجهندو ته بي رحم رينجرز وارن هڪ معصوم ”مهاجر“ نوجوان کي، جنهن جي شادي هڪ هفتي کانپوءِ ٿيڻي هئي، سندس گهر جي دروازي تي بي گناهه ماري ڦٽو ڪري ڏيو ۽ پوءِ هن جو لاش به ميت گاڏيءَ مان ڦري ويا!
اخبارن، ڪي ٽوءَ جي مائٽن ۽ لنڊن ۾ ويٺل الطاف حسين جنهن کي ڪجهه ڏينهن اڳ پاڪستان مان 80 لک رپيا اماڻيا ويا آهن، جو روڄ پٽڪو يا واويلا ته ايئن ڇاپي، ڄڻ اخبار سندس ئي رت مان مس ٺاهي ڇاپي وئي هجي! پر کين انهن بي موت مارجي ويل سنڌين جي رت جو هڪ ڦڙو به سمد بنائڻ لاءِ ڪو نه مليو ۽ نه وري کين انهن جي مائرن لاءِ اولاد جي اکين جو هڪ به لڙڪ ڦڙو نظر آيو جن کي راشد ڪي ٽوءَ پروڻ ڪري ڇڏيو هو! ظلم جو نتيجو ظلم ئي آهي. گوليون پوکبيون ته گوليون ئي ڄمنديون، گل ڪو نه ڦٽندا.
هڪ دهشتگرد جي موت تي هيڏو ماتم! جلد ئي کين پنهنجي عقل تي به ماتم ڪرڻو پوندو. بالڪل ايئن جيئن سنڌين پرو چانڊئي جي لاش تي اجرڪون وڌيون ۽ هاڻي..... ڪنڌ شرم کان هيٺ اٿن!