ابڙو اڪيڊمي Abro Academy
2020-11-05
داخلا نمبر 1003
عنوان دهشتگرديءَ واري هڙتال ۽ ”دهشتزدهه“ عوام
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1151
داخلا جو حوالو:
هن داخلا جون تصويرون نه مليون
23 آگسٽ 1995ع
دهشتگرديءَ واري هڙتال ۽ ”دهشتزدهه“ عوام
دهشتگرد سوڳ ملهائين ٿا ۽ دهشتزدهه اهو سوچيندو رهجي وڃي ٿو ته سوڳ جو اعلان ڪندڙن کان ڊڄي گهرن ۾ بند رهن يا حڪومت جي ان آٿت تي گهرن مان نڪري ڪمن ڪارين تي وڃن ته حڪومت سڀ انتظام ڪري ورتا آهن، سيڪيورٽي فورسز کي چوڪس ڪيو ويو آهي ۽ جيڪڏهن گاڏين کي نقصان پهتو ته حڪومت نقصان ڀري ڏيندي.
حڪومت گاڏين کي پهتل نقصان ته ڀري ڏيندي پر ڪنهن بيگناهه جي زندگي ڪير ڀري ڏيندو؟ اربع ۽ خميس ڏينهن واري سوڳ کي ڀوائتو بنائڻ لاءِ ايم ڪيو ايم جي قيادت شاگرد برادري کي ”ميدان عمل“ ۾ اچڻ جي هدايت ڪئي، ٽرانسپورٽ ۽ ڪاروبار بند رکڻ لاءِ چيو. بي بي سيءَ اڃا وڌيڪ چيڙائڻ لاءِ الطاف حسين جي ”دونهين دار“ تقرير نشر ڪئي ۽ چيو ته ”هاڻي هڙتال مان خبر پوندي ته ايم ڪيو ايم جو اثر اڃا باقي آهي يا نه!“
بي بي سيءَ کي صحافتي ايمانداريءَ جو ڀرم رکندي واضح طور چوڻ کپندو هو ته ايم ڪيو ايم جون پويون هڙتالون دهشتگرديءَ جي ڀَوَ کان ڪامياب ويون هيون ۽ هاڻي هڙتال جي سڏ کانپوءِ خبر پوندي ته دهشتگردن خلاف ڪاررواين بعد عوام جو خوف ڪيترو لٿو آهي. خوف پکڙجڻ ۾ وقت نه لڳندو آهي پر ڏهڪاءُ جو اثر هوريان هوريان لهندو آهي. ڪو به ماڻهو مرڻ پسند ڪو نه ٿو ڪري خاص ڪري وحشت ڀريو موت. ان ڪري جيڪڏهن ڪو موت جي ڊپ کان گهر ويهي ٿو رهي ته ان کي هڙتال جي نه، دهشت جي ڪاميابي چئبو. ڪير ٿو چئي سگهي ته دهشتگرد دهشت پکيڙڻ ۾ ڪامياب نه ٿيا آهن! ايم ڪيو ايم پاران هڙتال جو سڏ اڄ تائين بيگناهن جو قتل عام ثابت ٿيو آهي. حقيقتون پاڻ ڳالهائينديون آهن پر جيڪڏهن بي بي سي حقيقتون لڪائڻ چاهي ته ان کي ڇا ٿو ڪري سگهجي؟ بهر حال، موت جي ڊپ کي هڙتال ۾ شرڪت نٿو چئي سگهجي. بي بي سيءَ کي تاريخ جو رڪارڊ درست رکڻ لاءِ ايترو سچ ضرور ڳالهائڻ گهرجي.