ابڙو اڪيڊمي Abro Academy
2020-06-19
داخلا نمبر 129
عنوان ديري غازي خان ڏانهن
شاخ سنڌوءَ جو سفر
پڙهيو ويو 1441
داخلا جو حوالو:
هن داخلا جون تصويرون نه مليون
ان جي ته پرن جي اندرين پاسي جسم وارا کنڀ ڳاڙها هئا. باقي پاڻ ته سرمائي گاڏڙ بادامي رنگ جو پکي هو. سرخاب پرديسي پکي ناهي. اهي ئي سنڌوءَ جا ڪنارا سندس وطن آهي. ٻيٽن تي بيٺل وڻ ٻوٽا سَر، ڊڀ، ڪنڊي ۽ لئو کين لڪائين ٿا. خاص ڪري اهي جيڪي ٻيٽن تي آهن ڇو ته گدڙ وغيره اتي نٿا پهچي سگهن. درياهه جي الهندي ڪپ طرف ٽالهي ۽ بهڻ جا وڻ ڏسجن ٿا.
ٽپهريءَ ڌاري ديري غازي خان جي نئين پل هيٺ ٻيڙين لنگر هنيو. غازي گهاٽ واري قديم ٻيڙين جي پل هاڻي کڄي چڪي آهي. نئين پل ٺهي 5-6 سال ٿي چڪا آهن. تنهنڪري پراڻي پل جي ضرورت باقي نه بچي آهي. طوطي خان ٻڌائي ٿو ته اها پل سُڪي تي تيار ڪئي وئي ۽ پوءِ هوريان هوريان درياهه جو رستو ڦيرائي پل هيٺان ڪري ڇڏيائون.
پنجاب سرڪار جي عملدارن هتي به ڪو سٺو ورتاءُ نه ڪيو. جيئن ئي تنبو کوڙيا ويا ٻه چار پوليس وارا اچي نازل ٿيا. ”توهان کي هتي ترسڻ جي اجازت ناهي!“
”ڇو؟“
”ڇو ته هتي پوليس آفيسرن جي پڪنڪ آهي، هو ٻارن سان ايندا.“ ٿوري دم کانپوءِ هڪ صوبيدار آيو. مٿان بند تان بيهي بڪ ڪيائين. هيٺ ڪنڌيءَ تي لهي اچڻ سان عزت پئي گهٽجيس. هيٺ نه لهي نه لٿو. اسان تنبو نه اکيڙي نه اکيڙيا. پوءِ هو هليو ويو. ٽيم جو ضد ۽ سنڌ سرڪار جي گاڏي ڏسي همت نه ٻڌي سگهيو هوندو.