دينو لالاڻي پٿري دائرو

دينو لالاڻي پٿري دائرو (one CircleSt)

ڏهين وڳي ڌاري اسان ڪانڀي جبل جي اولهه ۾ (ديهه ڀال ۾) دينو لالاڻي ڳوٺ کان ٽي ڪلوميٽر اتر ۾ هئاسون. اسان جو سفر ڪرچات ڏانهن هو جو اسان جي نظر رستي جي ساڄي پاسي انهن پٿرن تي پئي. هتي ڪي پٿر لاوارث حالت ۾ ۽ کتل هئا. اهي اُڀا ۽ گولائيءَ ۾ اڌ دائري ۾ نظر آيا. ان دائري جي وچ ۾ هڪ جاءِ تي ڪجهه ايئن ٿي لڳو ڄڻ ڪا قربان گاهه (Alter) ٺهيل هجي. اهي اڻ گهڙيل پٿر ڪجهه کتل حالت ۾ هئا ته ڪجهه ڊٺل. هن دائري جو قطر تقريباً 16.30 ميٽر هو. هي ڪو معمولي قطر نه آهي. ان ۾ پٿرن جي اوچائي تقريباً .86 ميٽر ۽ 1.30 ميٽر هئي. انهن جي ٿولهه لڳ ڀڳ. 20 ميٽر هئي. يعنيٰ، اهي گهٽ وڌ هڪ ميٽر اوچائيءَ جا پٿر هئا. هتي ڪو به ٺڪراٺو نه هو ۽ هي هڪ خاموش ويراني ۾ تمام لاوارث قسم جو ماڳ هو.

هي پٿري دائرو هو جنهن جا اڌو اڌ پٿر گم هئا، باقي اڌ پٿر پنهنجي ترتيب ۾ اڌ گولائي مڪمل ڪيو بيٺا هئا. هن ماڳ جي سڄي ڪهاڻي گم هئي، البت دائري جي صورت ۾ کُتل اُڀا پٿر ۽ وچ ۾ قربان گاهه ٽائپ پٿر ڪجهه تجويز ڪري رهيا هئا. هتي ڇا قربان ٿيندو هو؟ هي پٿر ڪنهن کوڙيا؟ ۽ ڪڏهن کوڙيا؟ ڇا هيءَ تاريخ کان آڳاٽي سرگرمي آهي؟ اهو پٿري دائرو بهرحال، ڪنهن نه ڪنهن قسم جي رسم ادا ڪرڻ جو پِڙ هو. هي ماڳ دينو لالاڻيءَ کان 3 ڪلوميٽر اتر ۾ ۽ ڳوٺ دينو عاقلاڻيءَ کان 3 ڪلوميٽر ڏکڻ ۾ آهي.

هي پٿري دائرو ڏسندي ئي منهنجو ڌيان يورپ ۾ ، خاص ڪري انگلستان جي ٻيٽ تي موجود کوڙ سارن پٿري دائرن ڏانهن هليو ويو، جيڪي هن ئي قسم جا آهن ۽ آرڪيالاجسٽ انهن کي تاريخ کان آڳاٽا قرار ڏين ٿا.