رسول بخش مريءَ جو فلسفو

رسول بخش مريءَ جو فلسفو

هڪ ماڻهو جيڪو ڪڏهن مسلم ليگ جو هو ۽ هاڻي پيپلز پارٽيءَ جو آهي، اصل ۾ ڪنهن جو آهي؟ شايد ٻنهي ڌرين جو هجي پر سندس فلسفو ٻڌڻ کانپوءِ ايئن چئي سگهجي ٿو ته هو فقط ميمبريءَ جو آهي، پوءِ اها جنهن به طريقي سان ملي! مسٽر رسول بخش مري صوبائي اسيمبليءَ ۾ سرڪاري ڌر جو ميمبر آهي پر چوي ٿو، ”چونڊن جو نظام ختم ٿيڻ تائين ڌاڙا ۽ ڦرون بند نه ٿينديون... سياسي ماڻهو چڱن سان گڏ چورن کان به ووٽ وٺن ٿا، بعد ۾ کين ڇڏائڻ لاءِ فون به ڪن ٿا.“ مسٽر رسول بخش مريءَ کي اها شاباس ضرور ڏبي ته هن ٻڌي اهو اقرار ڪيو ته ”چورن کان ورتل ووٽن جي عيوض ۾ مجبوراً ڏوهارين کي ڇڏائڻ لاءِ فون ڪيون ٿا.“ سندس دليل آهي ته ”پنجاهه ڪم ڪرڻ بعد جيڪڏهن هڪ ڪم نه ٿو ڪيو وڃي ته ووٽر ڦري ٻيءَ ڌر ڏانهن هليو وڃي ٿو!“
ماڻهن جي دانهن پئي پوي ته سندن ڪم ڪو نه ٿا ٿين. ڪالهه نئين ديري ۾ مني اسٽيڊيم جي افتتاحي تقريب مهل جڏهن وزيراعظم اسٽيج تي ويٺي هئي ته ماڻهن نعرا پئي هنيا ته ”بينظير! کلي ڪچهري ڪر!“ کلي ڪچهريءَ جي مطالبي جي ڇا معنيٰ آهي؟ ماڻهو اندر ۾ ٻري رهيا آهن. هو پنهنجي حڪومت جي وزيراعظم کي ٻڌائڻ چاهين ٿا ته ساڻن ڪيڏو ناحق آهي ۽ سندن ڪم نٿا ٿين. محترمه جڏهن واپس هلي وئي ته نوجوان اهي درخواستون ميڙيندا رهجي ويا جيڪي هنن پنهنجن ڪمن لاءِ وزيراعظم تائين پهچائڻ لاءِ جمع ڪرايون هيون. مسٽر رسول بخش مري ته ڪو ”پهتل“ عوامي نمائندو آهي جو هڪ هڪ ماڻهوءَ جا پنجاهه پنجاهه ڪم ڪرايو وٺي ٿو. ان حد تائين جو چورن لاءِ به فونون ڪرڻ تي ”مجبور“ ٿي پوي ٿو.
چور جي سفارش! فقط ان ڪري ته هو کيس ووٽ ڏين ٿا. ان جو مطلب اهو آهي ته هاڻي هر چور ۽ ڌاڙيل مسٽر رسول بخش مريءَ جو وُٽر ٿي وڃي ته جيئن ڪو ”فون ڪرڻ“ وارو ته پٺيان هجي! مسٽر مري هن وقت عوامي نمائندو آهي. عوامي نمائندو هجڻ واقعي فخر جي ڳالهه آهي پر ڪنهن عوامي نمائندي کي ڇا ڪرڻ گهرجي؟ چور کي ڇڏائڻ لاءِ فون ڪرڻ ڪنهن به عوامي نمائندي کي ڪو نه ٿو ٺهي! جيڪڏهن اليڪشن وڙهڻ لاءِ چور جي سفارش ڪرڻ مجبوري ٿي پوي ته مسٽر مريءَ کي اهڙين چونڊن ۾ بيهڻ ئي نه گهرجي! ڏوهارين جي مدد ڪرڻ جي حق ۾ هونئن ته ڪو به دليل قبول نٿو ڪري سگهجي پر هيترو ڪمزور دليل اڳ ڪڏهن به نه ٻڌو ويو هوندو ته اول چونڊن جو نطام ختم ٿئي! چونڊن جو نظام ختم ٿئي ته پوءِ باقي ڇا ٿو بچي؟ هڪ جمهوري ايوان ۾ ويٺل عوامي نمائندي کي وضاحت سان ڳالهائڻ گهرجي!