ابڙو اڪيڊمي Abro Academy
2020-11-05
داخلا نمبر 1037
عنوان رينجرز هٿان برمي ۽ بنگالي ملاحن جي سرپرستي
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1545
داخلا جو حوالو:
هن داخلا جون تصويرون نه مليون
رينجرز هٿان برمي ۽ بنگالي ملاحن جي سرپرستي
وفاقي وزير قانون پروفيسر اين ڊي خان ڀلي پار مان ايم ڪيو ايم سان واعدو ٿو ڪري ته جيڪڏهن ايم ڪيو ايم اها ضمانت ڏئي ته ڪراچيءَ ۾ تشدد جو ڪو به واقعو نه ٿيندو ته هو ڪراچيءَ مان رينجز کي سڀاڻي ئي واپس گهرائي وٺندو. اهو بالڪل ممڪن آهي ته اين ڊي خان پنهنجو واعدو پاڙي،ڇاڪاڻ ته هو ضياءُ الحق نه آهي، جنهن پڻ ڀلي پار ۾ ويهي عام چوندن جا واعدا ته ڪيا پر ڦري ويو. پر، وزير قانون کي کپندو هو ته اها ڳالهه ايم ڪيو ايم کي ڪن ۾ چئي. ايم ڪيو ايم ته اڄ تائين اهو ئي پئي چوي ته خونريزي ايم ڪيو ايم نه، سرڪاري ايجنسيون پيون ڪن. ڀلا! اها تنظيم کلئي عام ڪيئن اقرار ڪندي ته ايم ڪيو ايم تشدد بند ڪري سگهي ٿي. ايم ڪيو ايم ان قسم جي ڪوڙڪين ۾ ڪو نه ڦاسندي. اها ڏاڍي ذهين مخلوق آهي.
وزير قانون ايم ڪيو ايم جي حوالي سان رينجرز کي جهلڻ لاءِ شرط ته وڌي آهي، پر انهن ئي رينجز جي خلاف اڄڪلهه سنڌ جي ڊيلٽا واري پٽيءَ ۽ سامونڊي ڪنڌين تي وڏو احتجاج هلي رهيو آهي. اتي به ملاحن ڪو تشدد به ڪو نه ڪيو آهي. هنن محض مٺيون ڀڪوڙي ۽ آسمان ڏانهن ڪنڌ کڻي نعرا هنيا آهن. اين ڊي خان انهن سان ته ڪو به واعدو ڪو نه ڪيو! حڪومت شايد ان انتظار ۾ آهي ته پهرين تشدد جا واقعا ٿين ۽ حالتون وڌيڪ خراب ٿين ته پوءِ ان طرف سوچيون!
ملاحن جو رينجرز خلاف احتجاج ٻن هفتن کان جاري آهي. ان احتجاج ۾ هاڻي مٺي پاڻي جا ملاح به شريڪ ٿي رهيا آهن. اربع ڏينهن خيرپور مان 500 ملاحن جو هڪ قافلو ڊيلٽا جي ملاحن سان گڏجي احتجاج ڪرڻ لاءِ جاتي پهتو. ٻه ڏينهن اڳ تائين ٺٽي ۽ بدين جا ست هزار هوڙا سمنڊ جي ڪنڌين تي بيهجي ويا هئا، جنهنڪري هڪ لک کان وڌيڪ ملاح بيروزگاريءَ واري حالت ۾ آهن. سنڌ جو وڏو وزير عبدالله شاهه به ان صورتحال کان واقف آهي ۽ قبول ڪري ٿو ته ”واقعي! مهاڻن سان زيادتي ٿي آهي. اسان رينجرز کان ٺيڪيداري سرشتو ختم ڪرائينداسين....... پر مهاڻن کي گهرجي ته هو هڙتال ختم ڪن.“
جڏهن وڏو وزير پاڻ مطمئن ٿي چڪو آهي ته مهاڻن سان سچ پچ ڏاڍائي ٿي آهي ته پوءِ تدارڪ هڪدم ٿيڻ کپندو هو. اها عجيب صلاح آهي ته ”... پر مهاڻن کي گهرجي ته هڙتال ختم ڪن!“ ملاحن کي هڙتال ڪرڻ جو شوق ڪونهي. هو ته اڄ ئي ڏينهن ڪمائڻ لاءِ سمنڊ ۾ هوڙا ڪاهڻ ۽ رڇ کوڙڻ لاءِ تيار آهن پر کين خبر آهي ته شڪار ڪيل مڇي رينجرز چوڪين تي ڦرجي ويندي. يا ته شاهه صاحب کي اهڙو پروانو جاري ڪرڻ کپندو هو ته رينجرز ملاحن کان مڇي نه ڦرين يا وري اها صلاح نه ڏيڻ کپندي هئي.
ملاحن جي هڙتال، ڪا اسڪولي ٻارن جي هڙتال نه آهي. هيءَ ته انهن مزدورن جي هڙتال آهي، جيڪي پنهنجي روزي ڪمائين ٿا ۽ سرڪار تي سندن ڪو به بار نه آهي، هٿئون انهن جي پورهئي مان سرڪار کي به ڪمائي ٿئي ٿي. پر، اها ڪيڏي نه عجيب ڳالهه آهي ته جڏهن مقامي ملاح رينجرز جي خلاف احتجاج تي هليا وڃن ته رينجرز وارا انهن بنگالي ۽ برمي ملاحن کي مقامي پورهيتن جي جاءِ تي آڻي بيهارين جن جي غير قانوني آبادڪاريءَ تي خود وفاق کي ڳڻتي آهي.
اڃا ڪالهوڪين اخبارن ۾ خبر ڇپي آهي ته غير قانوني پرڏيهين جي نيڪاليءَ لاءِ حڪومتي سطح تي سفارتي ڪوششون ٿي رهيون آهن، جنهن موجب بنگالي، برمي، ايراني ۽ افعاني باشندن جي ڏوهن، دهشتگردين ۽ سمگلنگ ۾ ملوث هجڻ جا اطلاع واسطيدار ملڪن کي ڏنا ويندا ۽ انهيءَ صنعتڪارن جي خلاف به قدم کنيو ويندو، جيڪي انهن غير ملڪين کي روزگار ڏيندا. پر سرڪار ان سوال جو جواب ڪنهن کي ڏيندي ته رينجرز وارن غير ملڪين کي جهلي ٻاهر ڪڍڻ بدران کين مقامي آباديءَ جي جاءِ تي مڇي مارڻ جي ڪم تي لڳائي ڇڏيو آهي؟