ابڙو اڪيڊمي Abro Academy
2020-10-27
داخلا نمبر 795
عنوان ست گهريون جنن جا گهر
شاخ منڇر گورک گاج دنيا
پڙهيو ويو 1177
داخلا جو حوالو:
هن داخلا جون تصويرون نه مليون
ست گهريون جنن جا گهر
غارن جو معائنو ڪندي مون محسوس ڪيو ته ٻوسٽ سبب گرم هوا انهن پٿريلين غارن ۾ ڦاسي پئي هئي ۽ تپش ايتري سخت هئي، جو هيڪر دماغ چڪرائجي ويو هو. هن ماڳ کي ’ست گھريون‘ ۽ جنن جا گهر به چون ٿا. جيڪو ڪائي ماٿريءَ ۾ بڊي جي اتر واري پاڙ ۾ واقع آھي. ماٿري چڱي پکڙيل آھي. ڪائي ۾ ھڪ وڏو قدرتي چشمو آھي، جيڪو چڱي خاصي زمين آباد ڪري ٿو. ھتي پن چڪي لڳل هئي جيڪا هاڻي تباهه ٿي چڪي آهي. هي ماڳ پٿرجي دور (12000 ق. م) جو آهي. اھي اوڀر منھيون آھن. ڪن غارن جي ڇت ڪري پئي آھي.
غارن جون ماپون ڪجهه هن ريت آهن: جيڪڏهن اتر کان ماپون شروع ڪجن ته غار نمبر ١ ڊيگهه اوڀر کان اولهه ٢٣ فٽ، اتر کان ڏکڻ ويڪر ٩ فٽ. اوچائي ٦ فٽ- اندر ٽن ڪوٺين جا آثار ملن ٿا. ٻه سالم آھن. غار کي ھڪ لنگهه آھي. غار جو ھڪ ٿنڀو ٽٽل آھي. غار جي منھن وٽ ڀتيون ٤ چار فوٽ ٿلھيون آھن. منھن واري لنگهه جي ماپ، اوچائي ٦ فوٽ ويڪر ٢ فوٽ.
غار -٢: ٻي غار فقط ھڪ ڪمري جي آھي. ڊيگهه ساڍا يارھن فٽ اوڀر کان اولهه ، نو فٽ ويڪري اتر کان ڏکڻ- اوچائيءَ ۾ پنج فٽ آھي. غار جو دروازو ساڍا ڇهه فٽ اوچو ۽ سوا ٻه فٽ ويڪرو آھي. ڀتيون اڍائي فٽ ٿلھيون آھن.
غار -٣: ٽين غار به ھڪ ڪمري واري اھي. اوڀر کان اولهه ١٢ فٽ اتر کان ڏکڻ ٩ فٽ ۽ اوچائي ۾ ٦ فٽ. لنگهه ساڍا پنج فٽ ڊگھو ۽ اڍائي فٽ موڪرو. ٻي ڪابه اڏاوت ڪانه آھي.
غار -٤: ھي غار وچ ۾ آھي، ۽ ڪشادي به آھي. داخل ٿيڻ لاءِ ٻه لنگهه اٿس. دروازن وارو ٿنڀو ڪريل آھي. اوڀر کان اولهه ٢٣ فٽ ڊگھي، اتر کان ڏکڻ ٩ فٽ موڪري، اوچائي ست فٽ غار ڪجهه ڊٺل حالت ۾ آھي.
غار -٥: اوڀر کان اولهه ١٦ فٽ، اتر کان اولهه ٢٠ فٽ ۽ ست فٽ اوچي. ھن غار ۾ ٻه ٿنڀا سلامت بيٺل آھن. ھر ھڪ ٿنڀو گردي ۾ ٥ فٽ موڪرو آھي. ٿنڀا ڪنڊن سان مستطيل شڪل ۾ گھڙيل آھن. اندر ھڪ ڪمري جي ماپ 8-1/2x7 فٽ آھي. اوچائي ٥ فٽ.
غار -٦: اوڀر کان اولهه ڊيگهه ١٤ فٽ اتر کان ڏکڻ ١٠ فٽ ۽ اوچائي ٧ فٽ. لنگهه چار فٽ اوچو ۽ ٽي فٽ موڪرو. ڀتين جي ٿولهه ٢ فٽ. ٻي ڪابه اڏاوت ڪانه آھي.
غار -٧: ھي غار ڊٺل آھي. صرف ڏکڻ ۾ ھڪ ڪوٺڙي اوڀر کان اولهه ٥ فٽ ۽ اتر کان ڏکڻ ٣ فٽ اوچائي ٥ فٽ اولهه کان ۽ اتر ڏکڻ کان ڏيڍ فٽ ماپ واري آھي.
غارن کان اڳتي، انور پنجتن باغ ڏانهن تڪڙيون وکون وڌايون. اوستائين جيپ جو رستو ڪونه هو. جمروز خان ان سخت گرميءَ ۾ به جيپ کي نه ڇڏيو. بهتر هو ته هُو به باغ ۾ ڪجهه وقت اچي آرام ڪري ها! هُو ڪافي سڏ ڪرڻ بعد به نه آيو ۽ گاڏيءَ جي سنڀال ۾ بيٺو رھيو، پٺاڻ ماڻهو! اسانجي سمجهائڻ کان چڙهيل هو.