ابڙو اڪيڊمي Abro Academy
2020-11-05
داخلا نمبر 1001
عنوان سرڪاري دستاويزن تائين عوام جي پهچ
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1065
داخلا جو حوالو:
هن داخلا جون تصويرون نه مليون
سرڪاري دستاويزن تائين عوام جي پهچ
ڪو به سرڪاري ڪاغذ عوامي دستاويز آهي ۽ ڪو به ماڻهو مقرر في ادا ڪري اهو ڪاغذ حاصل ڪري سگهجي ٿو. وڪيل برادري ان قانوني فقري کان چڱي طرح واقف آهي ۽ ان تحت ئي عدالتن مان ڪنهن به دستاويز جي ڪاپي حاصل ڪئي ويندي آهي. هاڻي جڏهن رشوت جي خاتمي لاءِ ڪو اهڙو بل پيش ٿين جي ڳالهه اڳتي وڌائي وئي آهي ته عام ماڻهن کي سرڪاري دستاويزن تائين رسائي رکڻ جو حق حاصل هجي ته اها ڪا بنهه نئين ڳالهه ڪو نه هوندي. وفاقي ڪابينا پنهنجي ايندڙ اجلاس ۾ پبلڪ انفارميشن ايڪٽ جي هڪ بل تي بحث ڪندي جنهن جو مسودو وفاقي اينٽي ڪرپشن ڪميٽيءَ (FACC) تيار ڪيو آهي. ڪابينا کي پيش ٿيل رپورٽ ۾ چيو ويو آهي ته دفاع ۽ سيڪيورٽي کانسواءِ ٻين سرڪاري دستاويزن تائين عام ماڻهن جي رسائي سان رشوت ۽ بدعنوانيءَ جي خاتمي ۾ مدد ملندي. ابتدائي اطلاع چون ٿا ته جيتوڻيڪ قانون، انصاف ۽ پارليامينٽري معاملن جي وزارت ان سان اتفاق ڏيکاريو آهي پر اها ڳالهه ڪامورن کي ڪو نه وڻي آهي.
اها ڳالهه نه رڳو ڪامورن کي ڪو نه وڻي آهي، پر اڪثر سياستدانن، سيٺين ۽ ٻين گهڻن کي به ڪو نه وڻندي. سبب اهو ئي آهي ته هو پاڻ ۾ ناني ويڙهو ٺاهي سڀ ڪجهه هضم ڪري وڃن ٿا. نئون بل ٺاهي FACC عوام کي پراڻو حق ياد ڏياريو آهي. اهو تمام اهم ڪم آهي ۽ جيڪڏهن اهو ڪم ٿي ويو ته پوءِ ڪامورن ۽ سياستدانن ۾ جيڪا ڦڙڦوٽ پوندي سان به جڳ ڏسندو. هن مهل ته صورتحال اها آهي جو ٻيلو کاتو توهان کي ايترو به ٻڌائڻ پسند نٿو ڪري ته ڪهڙي ڪيٽيءَ ۾ ڪيترا وڻ آهن، ان ۾ ڪيترو ٻٻر آهي، ڪيتري ڪنڊي، ڪيتري نم ۽ ڪيترو باهڻ آهي؟ صرف ان ڪري جو يا ته ڪارڪردگي ٻڙي هئڻ ڪري رڪارڊ ئي نه ٺهيو هوندو يا وري ان ڪري انهن ڪيٽين جا اڌ وڻ آر ايف او ۽ ڊي ايف او صاحبن جي حڪمن سان وڍجي چڪا هوندا. سرڪاري دستاويزن تائين رسائيءَ سان اهي ڳالهيون به کلي پونديون ته ڪهڙي ڳوٺ لاءِ اسڪول ڪاغذن ۾ اڏيو ويو پر سر زمين تي آهي ئي ڪو نه! اها ڳالهه به کلي پوندي ته ڪهڙي اسپتال تي ڪيتريون دوائون پهتيون پر اهي مريض کي ملڻ بدران ڪنهن ٻئي پاسي هليون ويون. اها ڳالهه به کلي پوندي ته ڪهڙي عوامي نمائندي ڪهڙي ملڪيت ڪيتري اگهه تي ورتي ۽ اها ڳالهه به ظاهر ٿيندي ته ڪهڙي معاملي جي انڪوائري ڪيئن ٿي ۽ انڪوائري ڪندڙن ڪهڙين حقيقتن جي پردهه پوشي ڪئي؟
بدعنواني فقط سرڪار جو مسئلو نه آهي. هي سڌو سنئون عام شهريءَ جو مسئلو آهي. جنهن جي نالي تي حڪومت شهري سهوليتن جا فنڊ رليز ڪري ٿي پر اهي ڪامورن ۽ ٺيڪيدارن ۾ حصو پتي ٿي وڃن ٿا. ان ڪري هر سرڪاري دستاويز تائين عام شهريءَ جي رسائيءَ جو هق تمام بنيادي حق آهي. ان سان يقينن هيرا ڦيرين ۽ بد عنوانين کي گهٽائڻ ۾ مدد ملندي. ان کان اڳ جو هي بل ڪامورن جي مخالفت جو شڪار ٿي وڃي، ان کي هڪدم قانوني شڪل ملڻ گهرجي.