ابڙو اڪيڊمي Abro Academy
2020-11-05
داخلا نمبر 1042
عنوان سفيرن خلاف اڳرائيءَ بابت لنڊن مان آڪاش واڻي
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1132
داخلا جو حوالو:
هن داخلا جون تصويرون نه مليون
سفيرن خلاف اڳرائيءَ بابت لنڊن مان آڪاش واڻي
ايم ڪيو ايم جي لنڊن واري مرڪزي سيڪريٽريٽ مان الطاف حسين آڪاش واڻي ڪئي آهي ته هاڻي پاڪستان ۾ غير ملڪي سفير مرندا. جيڪڏهن ملڪ ۾ غير ملڪي سفارتڪارن تي خوني حملا ٿيڻ جو ڪو خفيه پروگرام جڙيو آهي ته پڪ ڄاڻجي ته ان سازش ۾ اهي ئي ملوث آهن، جيڪي اڳواٽ اطلاع ڏيئي رهيا آهن ته ايئن ٿيڻ وارو آهي. هن ڀيري ايم ڪيو ايم اڳواٽ اطلاع ڏيئي رهيا آهن ته ايئن ٿيڻ وارو اهي. هن ڀيري ايم ڪيو ايم اڳواٽ ڪهاڻي گهڙڻ شروع ڪئي ته ” ايم ڪيو ايم کي پاڪستان ۽ پرڏيهه ۾ بدنام ڪرڻ لاءِ ان کي دهشتگرديءَ وارن حملن جي الزام ۾ ڦاسائڻ جي سازش تيار ڪئي وئي آهي.“ الطاف حسين چوي ٿو ته کيس ملائڪن اطلاع ڏنو آهي ته پاڪستان جون قانون نافظ ڪندڙ ۽ اٽيليجنس ايجنسيون دهشتگردن جي مدد سان پاڪستان ۾ رهندڙ پرڏيهي سفارتڪارن ۽ غير ملڪي شهرين تي حملا ڪندا ۽ ان ۾ ايم ڪيو ايم کي ملوث ڪرڻ لاءِ ڪوڙيون شاهديون ٺاهيندا.
ايم ڪيو ايم جي خيال ۾ هاڻي اها جيڪي ڪجهه ڪري، هر ذميواريءَ کان آجي آهي ڇاڪاڻ ته ان اطلاع ڏيئي ڇڏيو آهي ته سفارتڪار مرندا پر انهن کي ڪو ٻيو ماريندو. ايم ڪيو ايم اصل ۾ اهو چئي رهي آهي ته ”دهشتگرديءَ جي ايندڙ مرحلي ۾ سفارتڪارن کي مارينداسين ان ڪري اسان سان ٺهي وڃو، ٻيءَ صورت ۾ حڪومت جي نه رڳو ڏاڍي بدنامي ٿيندي پر ڪن ملڪن سان ناتا به ڦٽي پوندس.“
ڪا به حڪومت پرڏيهي سفارتڪارن ۽ غير ملڪين جي باري ۾ ڏاڍي محتاط هوندي آهي. ٽين دنيا جي ملڪن جون حڪومتون ته هيڪاري حيران ۽ پريشان هونديون آهن ۽ هر وقت پيون ڌڻيءَ در دعا گهرنديون آهن ته شال ولايتي عملدارن ۽ شهرين جو خير هجي! نيٺ به اهي ديوتائن جو اولاد هوندا آهن ۽ جڏهن ديوتائن جو اولاد مرندو آهي ته اهي چڙ ۾ جبلن کي پٽ ڪري ڇڏيندا آهن، درياهه ۽ سمنڊ سڪائي ڇڏيندا آهن ۽ کيت ۽ شهر موت اپائيندا آهن. پاڪستان سرڪار چيني، جاپاني ۽ جرمني انجنيئرن جي اغوا کانپوءِ ديوتائن جي بيچيني به ڏسي چڪي آهي ۽ڪراچيءَ ۾ شاهراهه فيصل تي آمريڪي قونصليٽ جي عملدارن جو خون به ڏسي چڪي آهي. ڪا به حڪومت ديوتائن جي پٽن کي خون ڪرڻ جي عياشي نٿي ڪري سگهي. ايئن فقط اهي ئي ڪري سگهن ٿا. جيڪي حڪومت لاءِ سوڙهه پيدا ڪرڻ چاهين. في الحال اها حڪمت عملي ايم ڪيو ايم (الطاف) کي ئي فائدو ڏئي سگهي ٿي.