0000-00-00
داخلا نمبر 1641
عنوان سمن سلطانن جا مقبرا
شاخ ڪينجهر ڪوهستان
پڙهيو ويو 30065
داخلا جو حوالو:
هن داخلا جون تصويرون نه مليون
سمن سلطانن جا مقبرا
مڪلي ٽڪريءَ جي انتهائي اتر واري ڀاڱي ۾ سمن سلطانن، شهزادن ۽ سندن اميرن جون قبرون آهن. ان کان به اڳتي سيد علي شيرازيءَ جو مقبرو ۽ ٻيون قبرون موجود آهن. جيتوڻيڪ هي سڀ ئي مقبرا مڪليءَ تي آهن پر سيد علي شيرازيءَ وارو ٽاڪرو ڀاڱو سمن جي مقبرن کان ڪجهه مٿڀرو آهي. سلطانن جي هنن مقبرن تائين پهچڻ لاءِ ٿورڙو وڪڙ کائڻو پوي ٿو. ڇاڪاڻ ته مڪليءَ جي ان ڀاڱي ڏانهن ويندي واٽ ۾ هڪ برساتي ڍورو پوي ٿو. ڄام نندي جي مقبري وٽ جيڪو ٽڪريءَ جي بلڪل اڀرندي ڪنڌيءَ تي آهي، اوڀر پاسي ڏسبو ته درياهه جو پراڻو پيٽ ۽ ٺٽو شهر نظر ايندو.
ڄام نظام جي مقبري ويجهو شيخ حماد جماليءَ جو مقبرو آهي جنهن جي وڏي عزت ۽ احترام هو. هن ئي مُچي ۾ سمن جي زماني جي جامع مسجد آهي. ان جي ڏکڻ ۾ مبارڪ خان، ملڪ راڄپال، فتح خان جي ڀيڻ ۽ ملڪ راهوءَ جو مقبرو آهي. انهن کان سواءِ ٽي گمنام قبرون به آهن. ڀر ۾ ئي ٽي ڇٽيون ۽ ڇٽي طرز جون ٿنڀايون اڏاوتون آهن. ڇٽين جي هيٺان گهاڙيون (قبرون) آهن. ڄام نظام واري مقبري جي اتر ۾ لڳو لڳ ٺهيل سهڻي ڇٽي ڄام تماچيءَ جي آهي. ٻيون ڇٽيون گمنام شهزادن جو آهن.