سنڌ بابت مولانا فضل الرحمان جو موقف

سنڌ بابت مولانا فضل الرحمان جو موقف

مولانا فضل الرحمان جيڪو ملڪي سياست ۾ سرگرم سڀ کان وڏي مذهبي تنظيم جو اڳواڻ آهي، جڏهن سنڌ جي ورهاڱي جي سوال تي سنڌ دوست موقف ظاهر ڪيو ته ان سان خوشي ٿي ۽ سنڌ محسوس ڪيو ته هرو ڀرو ايڏي اوندهه به نه آهي جيڏي اسان سمجهون ٿا... ۽ پاڪستان جون بيون قومون ۽ تنظيمون به هروڀرو ايم ڪيو ايم جي ڪوڙي پرچار ۾ بدگمان نه ٿيون اهن. ڪراچيءَ جو مسئلو حل ڪرڻ ۾ ڳالهيون ئي ڪم اينديون. اها ڳالهه مولانا صاحب کان اڳ ۾ سنڌ جو عوام به چوندو رهيو آهي ۽ اها ئي خواهش به رکي ٿو پر اڳلا بندوق کانسواءِ ڪا ٻي ٻولي ڳالهائن ئي نه چاهين ته پوءَ ڇا ڪجي؟ مولانا صاحب کي ان صورتحال تي ڪجهه رهنمائي ڪرڻ گهرجي.
وچ مدي وارين چونڊن مان ڪو به لاڀ نه ٿيڻو آهي، مولانا فضل الرحمان ان ڳالهه تي به سهمت آهي ۽ اهو به سمجهي ٿو ته ميان نواز شريف هن وقت پنهنجي ذاتي جنگ وڙهڻ لاءِ گرينڊ الائنس ٺاهي سڀني جماعتن کي پاڻ سان شامل ڪرڻ جي ڪوشش ۾ آهي. ان ڪري جڏهن هو ايئن چوي ٿو ته، ”اسان عورت جي حڪمرانيءَ جي بنياد تي مسلم ليگ جي جنگ نه وڙهنداسين“ تڏهن هو پاڻ کي ملڪ جي مکيه سياسي ڌارا ۾ رکي ٿو ۽ مذهبي جماعتن بابت مروج ان خيال کي عملي طرح رد ڪري ٿو ته اهي محض ليڪو ڪٽيندڙ آهن ۽ اجتهاد کي نظر انداز ڪن ٿا.
مولانا فضل الرحمان هن وقت جيڪڏهن هڪ حد تائين پ پ حڪومت جو اتحادي آهي ته ان جو مطلب اهو نه آهي ته هو ڪنهن مصلحت سبب پنهنجي موقف تان هٽي ويو آهي. هر ڪنهن کي اکيون اهن ۽ مولانا سمجهي ٿو ته نواز شريف هر دور ۾ مذهبي جماعتن کي پنهنجي اقتدار لاءِ ڏاڪڻ طور استعمال ڪيو آهي ۽ پوءِ اکيون ڦيرائي ڇڏيون آهن. ڪراچيءَ ۾ ايم ڪيو ايم جو ڪردار، مطالبا ۽ باقي صورتحال کان به هو چڱي طرح واقف آهي. هو چوي ٿو، ”حقن جو مطالبو ڪرڻ پنهنجي جاءِ تي پر جيڪڏهن علحيدگيءَس جا ڳالهه ڪئي وئي ته سڄي قوم مضبوط ديوار بڻجي ان جو مقابلو ڪندي.“
سنڌ جي وجود ۽ سلامتيءَ بابت مولانا جي موقف تي سندس ٿورا نه مڃڻ زيادتي ٿيندي. سندس موقف اصل ۾ سنڌ جي عوام جي موقف جي حمايت آهي. سنڌ دوستن پاران اسلام آباد ۽ لاهور م سنڌ جو موقف پيش ڪرڻ کانپوءَ مولانا فضل الرحمان جي بيان کي اڃا به اهميت ڏئي سگهجي ٿي. ضروري آهي ته سنڌ جو موقف پيس ڪرڻ لاءِ سنڌ دوست پنجاب، سرحد ۽ بلوچستان ۽ جي هر شهر ۽ ڳوٺ وڃن ۽ پاڪستان جي هر هڪ سياسي، سماجي ۽ ادبي تنظيم کي ٻڌائين ته اصل صورتحال ڇا آهي؟ سنڌ جي امن ۽ سک لاءِ سنڌ جو موقف هر ان ماڻهوءَ تائين بار بار پهچڻ گهرجي جيڪو سوچي ٿو. اها ڪوشش ان پاسي خاص طور ٿيڻ گهرجي جيڪي سنڌ جي بدران الطاف حسين جا اتحادي ٿيا آهن يا ٿي سگهن ٿا.