ابڙو اڪيڊمي Abro Academy
2020-11-05
داخلا نمبر 1026
عنوان سنڌ جو وڪيل برطانيا ۾
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1251
داخلا جو حوالو:
هن داخلا جون تصويرون نه مليون
سنڌ جو وڪيل برطانيا ۾
سنڌ نيشنل فرنٽ جي چيئرمين ممتاز ڀٽي لنڊن ۾ برطانوي وزارت خارجه جي عملدارن سان سنڌ جي دل جا ڏکڙا اوريا آهن ته هيانءُ کي ڪي قدر ڏڍ مليو آهي. ممتاز ڀٽي کين ايم ڪيو ايم جي پرچار جي اصل حقيقت کولي ٻڌائي ۽ اهي سڀ ڳالهيون چيون جيڪي سنڌ جا ماڻهو هڪ ٻئي ٻڌائي چپ ٿي ويندا آهن. انگريز کي سمجهائڻ لاءِ هڪ ئي دليل ڪافي آهي ته جيڪي ماڻهو 1947ع ۾ لٽجي ڦرجي ٻن ڪپڙن ۾ پاڪستان آيا، اهي اڄ پاڪستان جي سڀ کان وڌيڪ ترقي ڪيل شهرن جون سهوليتون، نوڪريون ۽ ملڪيتون هٿ ڪرڻ جي باوجود محروم ۽ مهاجر آهن ته پوءِ برپٽن ۽ جبلن ۾ رهندڙ سنڌين جو حال ڇا هوندو؟
انگريز ڏاڍو سياڻو آهي پر ان جي سڄي ساري سمجهداري برطانيا جي مفادن سان ڳنڍيل آهي. هو اهڙو ڪو به ڪم ڪو نه ڪندا اهن، جنهن سان برطانيا کي نقصان پهچي. الطاف حسين کي برطانيا ۾ پناهه ڏيڻ ۽ کيس پنهنجي ڌرتيءَ تان دهشتگردي هلائڻ جي اجازت انگريز سرڪار ڇو ڏني آهي؟ اهو سوال سنڌين جي سمجهه کان ٻاهر آهي. ان ڪري سنڌي قوم اهو سمجهڻ لاءِ حق تي آهي ته ايم ڪيو ايم پنهنجي چالبازي ۽ پروپيگنڊا سان انگريز سرڪار جي اکين ۾ به سرمو پائي وئي آهي. اهو سرمو ڌوئي صاف ڪرڻ لاءِ سنڌي ماڻهن کي پنهنجو موقف گهڻو اڳ برطانيا جي پارليامينٽ جي عيوضين ۽ وزارت خارجه جي آڏو رکڻ کپندو هو. ممتاز ڀٽي جي ڪوشش دير سان سهي پر درست آهي.
هونئن گهر جا مسئلا گهر ۾ نبرڻ گهرجن پر جڏهن ايم ڪيو ايم سڄي دنيا ۾ هاءِ گهوڙا ڪري سچ کي ڪوڙ ۽ ڪوڙ کي سچ ڪري پيش ڪرڻ شروع ڪيو آهي ۽ دنيا جي اکين ۾ ڌوڙ وجهي پاڻ کي مظلوم ۽ محروم قوم طور پيش ڪري همدرديون هٿ ڪرڻ شروع ڪيون آهن، تڏهن سنڌين لاءِ ضروري ٿي پيو آهي ته اهي هر ان فورم تائين پهچي پنهنجو موقف هنن کان به وڌيڪ زوردار نموني پيش ڪن جتي جتي ايم ڪيو ايم زهريلو ڪوڙ ڳالهائي چڪي آهي. ان کان اڳ ۾ جو گنيز بوڪ آف ورلڊ رڪارڊز ۾ ايم ڪيو ايم پاڻ کي مظلوم ۽ مجبور ترين تنظيم ۽ ”مهاجرن“ کي مظلوم ترين قوم طور داخل ڪرائي وڃي، سچ پڌرو ڪرڻو پوندو ته اها تنظيم ساڳئي ڪتاب ۾ داخل ٿيڻ جي لائق ضرور آهي پر دنيا ۾ سڀ کان وڌيڪ تيز رفتاريءَ سان ڪوڙ ڳالهائڻ ۽ دنيا جي سڌريل قومن کي بي وقوف بنائڻ ۾. ان سڀ کان پهرين برطانيا کي بيوقوف بنائڻ جي ڪوشش ڪئي ۽ پوءِ آمريڪا کي. اهي سچ پچ ٿي به پيون.
ممتاز ڀٽي ڪيڏو به مدبر ۽ سنڌ ڪيس جو سڀ کان سٺو وڪيل ڇو نه هجي. هو هڪ فرد آهي. ٿي سگهي ٿو ڪنهن ڌر جا ممتاز ڀٽي سان ڪي سياسي اختلاف به هجن پر سنڌ ۽ سنڌ ڪيس بابت هن لاءِ ڪنهن کي ڪا ٻي راءِ ٿي نٿي سگهي. اهو سمجهڻ ته ايم ڪيو ايم ۽ سنڌ ڪيس ڪي وقتي سياسي معاملا آهن، مناسب نه ٿيندو. هيءَ هڪ شطرنج آهي، جيڪا ڪيڏي به ڊگهي ٿي سگهي ٿي ۽ ڪنهن به مهل ”شهه مات“ ٿي سگهي ٿي. سنڌ جي مفادن سان کيڏندڙ سامهون واري ڌر تمام شاطر ۽ بي رحم ثابت ٿي چڪي آهي. ان ڪري سنڌ جي مفادن سان سچائي رکندڙن کي پنهنجيون سموريون صلاحيتون هڪ هنڌ ڪٺيون ڪرڻيون پونديون ۽ ڪنهن گڏيل حڪمت عمليءَ تحت مخالف ڌر جي چالن جو جواب ڏيڻو پوندو.
ٻيو نه ته سنڌ ڪيس جي حد تائين گڏجڻو وندو، سنڌ خلاف تيار ٿيندڙ سازشن جي هر ”لنڊن پلان“ کي مضبوط حڪمت عملي سان ناڪام ڪرڻو پوندو. ان لاءِ هڪ تجويز اها به ٿي سگهي ٿي ته ممتاز ڀٽي سميت ڪجهه ٻين مدبر سياستدانن ۽ وڪيلن جي هڪ مستقل ٽيم جوڙي وڃي جيڪا عالمي سطح تي ايم ڪيو ايم جي زهريلي ۽ ڪوڙي پروپيگنڊا جو دليل سان جواب ڏي ۽ سچ کي ثبوتن سان پيش ڪري. ساڳي طرح پاڪستان جي سطح تي به هڪ ڪميٽي هجي جيڪا پنهنجا، سرحد ۽ بلوچستان جي عوامي حلقن کي اصليت کان آگاهه ڪندي رهي.