ابڙو اڪيڊمي Abro Academy
2020-11-06
داخلا نمبر 1152
عنوان سنڌ جي سوچ بدلجي رهي آهي؟
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1128
داخلا جو حوالو:
هن داخلا جون تصويرون نه مليون
مدعني وسيلن کان وٺي لامياتي فنڊن جي ورڇ تائين ميان صاحب سنڌ مخالف طبقن جي ڌر ۾ بيٺو آهي. هو سياسي ڪروکيتر ۾ دريوڌن جي ڌر آهي ۽ اتان هٽي ئي نٿو سگهي. جنهن ڏينهن تي هن پنجاب ۽ سنڌ جي معاشي حقن جي سوال تي سنڌ جا تاريخي حق قبوليا، هو پنهنجي ئي سينا جي سيناپتيءَ واري عهدي تان هٽي ويندو. سنڌ بابت پنهنجي پوزيشن ٻڌائيندي سندس هر ”وضاحت“ هڪ جنگي چال هوندي. هلندڙ جنگ ۾ وضاحتون طلب ڪرڻ ايئن آهي جيئن ڪو بچاءُ لاءِ تدبيرون ڳوليندو هجي!
پليجي صاحب جا سوال رڳو سنڌ جي ماڻهن ۽ سياسي تنظيمن کان ئي ڪو نه آهن ۽ نه وري اهي غير واسطيدار آهن. اهي اڄ جا تمام اهم ۽ اڄ جي ايجنڊا جا سڀ کان پهريان سوال آهن جن تي عوام کان وڌيڪ خود حڪومت کي سوچڻو آهي ته اها سنڌ جي مسئلن تي ڪٿي بيٺي آهي. يقيناً ”سڀ ٺيڪ آهي“ واريون سڀ رپورٽون غلط آهن.خفيه رپورٽون ڪجهه ٻيو ڳالهائي رهيون آهن ۽ ”سر زمين“ جي صورتحال ڪجهه ٻيو تجزيو ڪري رهي آهي. حالتون اتي اچي پهتيون آهن جو پيپلز پارٽيءَ کي ”فطري اتحادي“ سمجهندڙ ڌريون به کانئس مايوس ٿيڻ لڳيون آهن. ننڍيون وڏيون عوامي تنظيمون ”مخالفت“ تي لهنديون نظر پيون اچن. حڪومتون عوام جا نه، خواص جا مسئلا حل ڪري رهيون آهن ۽ عوام جا مسئلا گڏ ٿي جبل جيڏا ٿي ويا آهن. سنڌ ايئن سوچي رهي آهي ته ، ”سنڌين جي حڪومت“ جي اوٽ ۾ ڪي خاص طبقا حڪومت ڪري رهيا آهن، سنڌ سنڌين جي هٿن مان نڪري رهي آهي ۽ جمهوريت جي نالي ۾ ڪي خاص ماڻهو مخصوص حق حاصل ڪري رهيا آهن. انهن سوالن جيتوڻيڪ اڃا بعاوت جي صورت اختيار نه ڪئي آهي پر جيڪڏهن حالتون برقرار رهيون ته ذهنن ۾ پيپلز پارٽيءَ جي خلاف بغاوت جا ٻج پوکجڻ وارو عمل ڪنهن به مهل شروع ٿي سگهي ٿو.