ابڙو اڪيڊمي Abro Academy
2020-11-05
داخلا نمبر 1126
عنوان سنڌ دشمن آفيسرن کي ڇـُوٽ ڇو؟
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1128
داخلا جو حوالو:
هن داخلا جون تصويرون نه مليون
20 آڪٽوبر 1995ع
سنڌ دشمن آفيسرن کي ڇـُوٽ ڇو؟
سنڌ جي ڪچين آبادين واري اٿارٽيءَ جو ڊائريڪٽر جنرل تسنيم احمد صديقي گذريل ڏهن سالن ۾ ٽيون يا چوٿون ڀيرو انتهائي متعصب ۽ سنڌ دشمن عملدار جي حيثيت ۾ سامهون آيو آهي. جڏهن جڏهن به هن کي ڪا اهڙي ذميواري ڏني ويئي آهي ته هن هڪ مخصوص لساني تنظيم لاءِ ”سنڌ حڪومت ۾ پلانٽ ڪيل ٽيڪنوڪريٽ“ جي حيثيت ۾ ڪم ڪيو آهي. هن وقت مٿس الزام لڳو آهي ته هن غير ملڪي آبادڪارن جي غير قانوني ڪچين آبادين کي پڪو ڪيو هو. هن عملدار سنڌ حڪومت جي ڪيئي حڪمن کي بار بار رد ڪيو ۽ اڻسڌيءَ طرح وڏيوزير سان ”ٽڪر“ ۾ اچي ويو. حڪومت کيس هدايت ڪئي هئي ته ”سڄي سنڌ ۾ پڪيون ڪيل ڪچين آبادين جي ليز تي نئين سر نظرثاني ڪري غير قانوني پرڏيهين جي آبادين کي ڏنل ليز آرڊر رد ڪيا وڃن.“ پر تسنيم صديقيءَ ايئن نه ڪيو ۽ ان فيصلي ۾ عملي طرح رنڊڪون وڌيون. واضح هجي ته ڪراچي جي اڪثر انهن آبادين کي پڪو ڪيو ويو آهي جن ۾ بنگالي ۽ افغاني آهن، جڏهن ته قديم سنڌي ڳوٺن کي ليز ڏيڻ بدران انهن کي بيدرديءَ سان بلڊوز ڪيو ويو آهي.
هي اهو ئي تسنيم صديقي آهي جيڪو 1988ع ۾ حيدرآباد ڊيولپمينٽ اٿارٽيءَ جو ڊائريڪٽر جنرل هو ۽ جنهن جو 21 نومبر 1988ع تي، ايڇ ڊي اي جي ليٽر هيڊ تي عظيم طارق ڏانهن لکيل هٿ اکر خط بعد ۾ پڪڙجي پيو هو، ان خط ۾ هن لکيو هو ته، ”سنڌ جي ورهاڱي لاءِ اوڪلي جي حيدرآباد واري دوري ۾ منهنجي ساڻس تمام سنجيده ڳالهه ٻولهه ٿي.آئون اهو به ٻڌائڻ گهران ٿو ته هيستائين مون ”خدا ڪي بستي“ نالي رهائشي ڪالونيءَ ۾ هڪ هزار بهاري مهاجر خاندانن کي ”بي گهر خاندان“ ڏيکاري آباد ڪري ڇڏيو آهي.“ ان ئي خط ۾ هن تجويز ڏني هئي ته ”سنڌ يونيورسٽي جي چوڌاري گهيرو تنگ ڪرڻ لاءِ ضروري آهي ته گلشن شهباز واري علائقي ۾ 6 لک مهاجرن کي آباد ڪيو وڃي، انهن مان ٻن لکن جي آباديءَ کي ”خدا جي بستي“ ۾ آباد ڪرڻ لاءِ مان بالڪل تيار آهيان ۽ باقي چار لک مهاجرن کي آباد ڪرڻ لاءِ هتان جي مقامي زميندارن کان زمين خريد ڪري اتي رهائشي اسڪيمون شروع ڪرڻيون پونديون... منهنجي وس ۾ جيڪو هوندو، سو ڪندو رهندس.“ خط جي پڇاڙيءَ ۾ هن ايم ڪيو ايم لاءِ زندهه باد جو نعرو به لکيو. اهو خط اخبارن ۾ ڇپجي چڪو آهي.
1988ع کان هو پنهنجي ”نظرياتي ڪمڪ“ تي سرڪاري ادارن ۾ ويهي پوري قوت ۽ رفتار سان ڪم ڪري رهيو آهي ۽ ان وچ ۾ سنڌ کي اهڙا سازشي ۽ سنڌائتا ڌڪ هنيا اٿائين جو انهن جو صدين تائين اثر رهندو. هڪ سازشي آفيسر سنڌين جي اڪثريت کي اقليت ۾ تبديل ڪرڻ لاءِ سائنسي بنيادن تي سالن تائين ڪم ڪندو رهيو، 1988ع ۾ سندس سازشي رٿائن جو راز فاش به ٿيو پر پوءِ به هن کي سندس ڪم جاري رکڻ لاءِ آزاد ڇڏيو ويو! تعجب کانسواءِ ٻيو ڪو به اظهار ڪري نٿو سگهي! هاڻي به کيس ڪنهن سزا ۽ پڇاڻي کانسواءِ ٻيو ڪو به اظهار ڪري نٿو سگهي! هاڻي به کيس ڪنهن سزا ۽ پڇاڻي کانسواءِ هڪ سال لاءِ يورپ ۾ وڃي موڪل ماڻي اچڻ لاءِ چيو ويو آهي. شايد ان لاءِ ته هو اتي وڃي ”پيرصاحب“ سان وڌيڪ صلاحون ۽ مشورا ڪري!