سهو صحرائي يا ميداني

صحرائي يا ميداني سهو Desert Hare - Lepus nigricollis dayanus -

سهو صحرائي يا ميداني

هي ننڍڙو خوبصورت ۽ پشمي جانور سڄي سنڌ پنجاب ۽ سنڌ جي جابلو علائقي ۾ به ٿئي ٿو. ان جي اک وڏي، گول ۽ ڪاري هوندي آهي. ٽنگون سنهيون ڊگهيون، ڪَن اڀا ۽ ڊگها اٿس. ان جي پشم معمولي ڳاڙهسري وارياسي ڀوري ۽ پڇ ننڍڙو، ڦِلڦلهو ۽ ناسي رنگ جو هوندو اٿس، جيڪو جابلو سهڙ Lepus capensis ۾ ڪارو ٿئي ٿو. هي سهو جڏهن ڊوڙندو آهي ته پڇ هيٺ هوندو اٿس، جنهن ڪري ان جو هيٺيون اڇو رنگ نظر نه ايندو آهي.
جوان صحرائي سهو مٿي کان پڇ جي پاڙ تائين سراسري طور 48 سينٽي ميٽر ٿئي ٿو، پڇڙي 7 يا 8 سينٽي ميٽر هوندي اٿس. ان جا پويان پير 10.2 سينٽي ميٽر ٿين ٿا ۽ ڪَن پيرن جي نسبت ۾ ڪجه وڌيڪ ڊگهڙا هوندا آهن. جسم جو وزن عام طور 1.4 ڪلو گرام ٿئيس ٿو.
سڄي سنڌو ماٿريءَ ۾ گهٽ ڳُتيل علائقن ۾ رهي ٿو. چولستان ۽ ٿر ۾ به جام آهي. هي ٽاهڙ ۽ ڊڄڻو جانور غيرآباد علائقا پسند ڪندو آهي. پر آباد نهري علائقن ۾ رهڻ جو گـُر به سکي ورتو اٿس. گاهه خور آهي. صبح جو سوير ۽ شام جو گاهه خوريءَ لاءِ نڪرندو آهي ۽ خطري کان هر وقت هوشيار نظر ايندو آهي.
اهي گاهه ۽ سنهڙيون ٽاريون کائيند آهن. هن ڪٽنب جي جانورن ۾ هاضمي جو خاص نظام ٿئي ٿو، هن سهي ۾ به هيٺيون اوجهه هوندو آهي جنهن جي وسيلي سائي گاهه جي ريشن کي هضم ڪندو آهي. ان عمل کي اوڳر چئبو آهي، جنهن ۾ اهي نرم ٿيل ڳوڙهيون يا چاڻا وري ڳيهندا آهن. صحرائي سها اڪثر لومڙين ۽ عقابن جو شڪار ٿيندا آهن.