سوناري (سونهري) ڪوراڙ

سوناري (سونهري) ڪوراڙ /Spalerosophis arenarius/ Royal snake

هن ڪوراڙ کي راجتبنس ۽ شاهي بلا به چون ٿا. هيءَ خوبصوت بلا لڳ ڀڳ هڪ ميٽر ڊگهي ٿئي ٿي، ان جو پڇ 120 کان 160 ملي ميٽر هوندو آهي. ڏکڻ ايشيا ۾ وڏي کان وڏي ڪوراڙ 2 ميٽر ڊگهي ريڪارڊ ڪئي وئي آهي. جسم هلڪو ڀورو يا ڳاڙهاڻ مائل هوندو اٿس جنهن تي ڳاڙهن يا گـهِرن ناسي ڀورن رنگن ۾ چٽن جون پنج قطارون هونديون آهن. وچ واي قطار ۾ 50 کان 70 تائين وڏا وڏا چٽ هوندا اٿس ۽ پيٽ چمڪدار ٿيندو آهي. سوناريءَ جي مٿي تي V ۽ W شڪل جا هڪ ٻئي پويان ٻه نشان ٿين ٿا. اکين کان آرپار ناسن کان ڄاڙيءَ تائين پڻ هڪ هڪ ليڪ ٻنهي پاسي هوندي آهي. هي ءَ بلا ريتيلي پٿريلي ۽ ٻوُڙن واري علائقي کي پسند ڪندي آهي ۽ پري پري تائين وڃي شڪار ڳوليندي آهي. ڪوئا، ڪِرڙيون ۽ صحرائي پکي کائيندي آهي. طبيعت ۾ گهڻي ڪاوڙ نه اٿس. مادي اپريل کان مئي تائين 10 کان 12 آنا ڏيندي آهي. ماحولياتي تبديليءَ جي ڪري هن بلا جو نسل خطري ۾ آهي، ڪي ماڻهو ان جي سهڻي کل لاءِ به شڪار ڪندا آهن. هيءَ بلا راجپوتانا، سنڌ ۽ لسٻيلي ۾ ملي ٿي.