سيڙهه

سيڙهه Porcupine / Hystrix indica/
سيڙهه
هي مماليه 25 کان 30 انچ ڊگهو ٿئي ٿو. پڇ ننڍڙو يعني 4-5 انچ ٿيندو اٿس. پٺيءَ تي اڇا ڪارا ڊگها ڪنڊا هوندا اٿس، جن جي نوڪ سفيد هوندي آهي پر مجموعي طور تي ان جي پُٺي ڪاري آهي. ڪنڌ تي کُـهرن ڪنڊيدار وارن جي جهنڊ هوندي اٿس. ان جون اکيون ننڍڙيون، ڪَنَ ننڍڙا، چنبا مضبوط ، پير ۽ ٽنگون ڪاريون، ڳچيءَ هيٺان اڇو پٽو ۽ منهن تي ڊگهيون مڇون ٿينديون اٿس.
سيڙهه دڙن، پوٺن يا ڪنڌين تي اونهو ٻِر کوٽي ٿي جنهن ۾ گهڻيون گهٽيون ۽ ٻاهر نڪرڻ لاءِ دروازا هوندا آهن. سيڙهه ڏينهن جو ٻِر ۾ بند رهندي آهي ۽ رات جو نڪرندي آهي. وڻن جا ڇوڏا، ڳنڍدار پاڙون ۽ فصلن سميت ٻي نباتات به کائي ٿي. پُٺيءَ جا ڪنڊا خطرناڪ جانورن کان بچاءُ لاءِ اٿس. خوف خطري مهل ڪنڊا کڻي اُڀا ڪندي آهي ۽ دشمن کي پٺي ڏيئي بيهندي آهي. سيڙهه جو ڪنڊو ان جي جسم مان سولائيءَ سان ڌار ٿي دشمن کي چڀيندو آهي ۽ ڏاڍي تڪليف ڏيندو آهي. مادي 6 کان 8 هفتا پيٽ ڪري ٿي ۽ هڪ کان چار ٻچا ڏئي ٿي. ان جي ٻولي رابطي خاطر هوندي آهي ۽ اها هڏڪار يا گرڪاٽ ڪندي آهي. هي ماحول : 6 جو مماليه آهي.