سَـرهه

سَـرهه Sindh Ibex - Capra aegagrus -


نَر سرھه ڪلھن تائين 27 کان 36 انچ ٿئي ٿو. مادي جو قد 21 کان 14 انچ ڏٺو ويو آھي. نَر جا سڱ 33 کان 51 انچ ڊگھا ۽ ڪمان دار ٿين ٿا. وڏي ڄمار جي سرھه جا سڱ 270 ڊگرين جو وڪڙ کائي ويندا آھن. ماديءَ جو سڱ 6 انچ ٿيندو آھي. تيز اکروٽي يا ڀُوري ناسي رنگ جا مضبوط سڱ جوڳي فقير نفيل طور استعمال ڪندا آهن. نَر سَرهه کي ڏاڙهي ٿئي ٿي. هن جابلو ٻڪر جي ڪنڌ سان ڪاري ڌار ٿئي ٿي. مادي سرهه جنهن کي جابلو ماڻهو ٻڪري چوندا آهن، ڳاڙهسري ناسي ٿئي ٿي. ان کي ڏاڙهي نه ٿي ٿئي. ان جا سِڱ ننڍڙا وڪڙ دار ٿين ٿا. ٻن سالن جا ٻٺ ٻڪريءَ جهڙا ڏسڻ ۾ ايندا آهن.
سرهه گهڻو ڪري جبل جي ڏرڙن، ڦوڙن، جهڏن ۽ گُرين ۾ رهندا آهن. سرهه اتي پهچي سگهندو آهي جتي عام طور تي ڪو به ٻيو جانور پهچي نٿو سگهي. اڪثر جبلن جي ڪرنگهن سان گاهه چرندو ۽ ڪڏھن ڪڏھن 50 کان 60 پھرن جي وڏين ٽولين ۾ گهمندو وتندو آهي. صبح جو سوير ۽ شام جو چرڻ لاءَ نڪرندو آهي ۽ ڏينهن جي گرم وقتن ۾ پنهنجين پناهه گاهن ۾ لڪل رهندو آهي. جبل تان هيٺ تمام خبرداريءَ سان لهندو آهي. ٿوري ئي خطري جي بُوءِ تي ڏينهن جا ڏينهن پاڻيءَ جي ذخيري تي نه ايندو آهي. اڃ جو ڏاڍو آهي، خاص ڪري سياري ۽ برسات جي مند ۾ پاڻي جي اڪثر ضرورت خوراڪ مان ئي پوري ڪري وٺندو آهي. ان جي خوراڪ عام ٻڪر جھڙي ۽ انداز به ساڳيو آھي جو ٻن پيرن تي بيھي وڻن جا پَن چرندو آھي يا ٽپو ڏيئي وڻ تي چڙھي ويندو آھي. سرھه ماحول : 2 ۾ رھي ٿو جيڪو زڙدن (زردن) ۽ انھن کان مٿين علائقن تي مشتمل آھي.