سِـهڙ، جابلو سهو

سِـهڙ، جابلو سهو Cape Hare - Lepus capensis -
سِـهڙ، جابلو سهو
شڪل صورت ۾ صحرائي سهي جهڙو ٿئي ٿو پر ڊوڙڻ مهل سرمائي پشم سبب ظاهر ٿي پوندو آهي ۽ جڏهن ڊوڙندو آهي ته ان جي پڇ هيٺان ڪارو پٽو ڏسبو آهي.
سهڙ صحرائي سهي کان ٿورو ٿلهڙو به ٿيندو آهي. ان جا ڪَن ڀيٽ ۾ ڪجهه ننڍا پر ويڪرا ٿيندا آهن. پيٽ جي پشم بلڪل اڇي هوندي اٿس. صحرائي سهي ۾ ڇاتي ڀـُورسري ناسي هيڊي ٿئي ٿي.
جوان سهو مٿي کان پڇڙيءَ جي پاڙ تائين 41 سينٽي ميٽر ريڪارڊ ڪيو ويو آهي. پُڇ 8.5 سينٽي ميٽر ۽ پويان پير 12 سينٽي ميٽر هوندا اٿس. سِهڙ جا ڪَن پوين پيرن کان ٿورا ننڍا ٿين ٿا. وزن عام طور تي 2 ڪلوگرام ٿئيس ٿو.
قراقرم، سرحد بلوچستان جي جبلن ۽ کيرٿي ۾ ٿئي ٿو. اهي سخت ٿڌ ۽ خشڪ پهاڙي علائقن ۾ به رهي سگهن ٿا. اهي گاهه خور آهن ۽ هر قسم جو گاهه ۽ سنهيون ٽاريون کائين ٿا. سخت حالتن، طوفانن ۽ اس جي تپش ۾ چنبن سان ننڍڙا ٻِر کوٽي پناهه وٺي سگهن ٿا. خطري وقت ڊوڙي وڃي ڪنهن سوڙهي ٻِر ۾ پناهه وٺندا آهن. چٻرا، ڦيڪاريون، لومڙ ۽ عقاب انهن جو شڪار ڪندا آهن.
مادي هر سال اونهاري ۾ ٻه جاڙا ٻچا ڄڻيندي آهي جيڪي 30 ڏينهن کان گهٽ وقت ۾ پاڻڀرا ٿي ويندا آهن.