سِيتا جي لٽ

سيتا جي لَٽ /Amphiesma stolata / Buff-Striped Keelback

بلائن جي هيءَ جنس ڪولوبر، نئٽرِڪس ۽ زينوڪروفس وغيره کي سڀ کان ويجهي آهي. ان جي ڊيگهه عام طور 0.48 کان 0.55 ميٽر ۽ پڇ 85 ملي ميٽر ٿيندي آهي. هن مهل تائين هن جنس جو وڏي ۾ وڏو نانگ 0.90 ملي ميٽر ڏٺو ويو آهي پر ورلي ڪو 0.62 ملي ميٽر (ٻه فٽ) کان وڌيڪ ٿئي ٿو. ان جي جسم جو رنگ هلڪو ڀورو، پٺيءَ تي ساڄي کاٻي هلڪيون پيليون ليڪون ۽ انهن ليڪن جي وچ ۾ ڪارا ۽ سرمائي چٽ ٿين ٿا. مٿو نيراڻ مائل مِٽيائون، مٿي تي وات ۽ اک وٽ ڇلي نما ڪارو هوندو اٿس. ڪنڌ تي انگريزي اکر ‘V’ شڪل جو ڪارو نشان ۽ پيٽ اڇو ٿيندو اٿس.
هيءَ بلا ٻنين ۽ گاهير ميدانن ۾ ملندي آهي. بظاهر گِهميل جاءِ پسند ڪندي آهي. مئي ۽ جُون ۾ 6 کان 10 ڊگها آنا ڏيندي آهي، جن مان جولاءِ آگسٽ ۾ ٻچا ڦُٽي پوندا آهن. ان جي خوراڪ ڏيڏر ڪِرڙيون ۽ جيت ماڪوڙا آهي. خطري وقت پنهنجي جسم جو اڳيون حصو چپٿرو ڪري نانگ وانگر جسم مٿي کڻندي آهي، ۽ ان کي تيزيءَ سان ساڄي کاٻي لهرون ڏيندي تيز تيز هلندي آهي. پري وڃي جسم اصلي حالت ۾ آڻي تيزيءَ سان ڀڄي ويندي آهي.
لائوس، ٿائيلينڊ، چين آسام، بنگله ديش، هندستان، سري لنڪا ۽ پاڪستان جي ميداني علائقن ۾ ٿئي ٿي.