شهر جا دروازا

شهر جا دروازا:

کوٽائيءَ ۾ هن مهل تائين قلعي جا ٽي دروازا ظاهر ٿيا آهن . اوڀر وارو دروازو جتان سڄو ٻاهريون شهر ڏسڻ ۾ اچي ٿو ۽ جيڪو ڏاڪڻين جي ذريعي قلعي کي اوڀر رخ ۾ ملائي ٿو. اهو دروازو تلاءَ مان پاڻي حاصل ڪرڻ لاءِ استعمال ٿيندو هو. ۽ اهو تلاءُ يا ڍنڍ بلڪل دروازي جي ڀر ۾ آهي. ان جا ڏاڪا جيڪي هاڻي بنهه زبون حالت ۾ آهن ، تمام ويڪرا آهن، جنهن مان لڳي ٿو ته اهي پاڻي آڻڻ لاءَ باربردار جانورن جي اچ وڃ لاءِ ٺاهيا ويا هئا.

باقي ٻه دروازا سٺي حالت ۾ آهن، ۽ چڱا خوبصورت آهن. انهن جا ڏاڪا عمدا آهن، جيڪي گهڙيل پٿرن سان ٺاهيا ويا هئا. اتر اوڀر وارو دروازو هڪ اڌ گولائي دار گهر کي تلاءَ سان ملائي ٿو ۽ شايد اهو ان گهر وارن جي ذاتي استعمال لاءِ مخصوص هو. هي ءُ دروازو ڏهه فٽ ويڪرو هو ۽ اهو نامعلوم سبب ڪري پٿرن ۽ مٽيءَ سان بند ڪيو ويو هو. ان دروازي جي ٻئي پاسي سنها ۽ ويڪرا پٿر وڇايا ويا هئا. ان جي سامهون هيٺ پٿر جو پُشتو آهي. پُشتي جي اندران گهڙيل پٿرن جو ڏاڪڻيون آهن. هي ڏاڪڻيون پاڻيءَ جي سطح تائين پهچن ٿيون.

ڏاکڻو دروازو جتان سمنڊ نظر اچي ٿو، چڱي مرعوب ڪندڙ اڏاوت آهي، ان جي ٻنهي پاي کان اڌ گولائي دار ۽ مضبوط برج آهن ۽ انهن جي پويان هڪ ڏيڍي آهي، جنهن جي عمارت وڏي ۽ پائدار آهي. دروازو اَٺ فٽ ويڪرو آهي. ۽ ان جون ڪشاديون ڏاڪڻيون گهڙيل پٿرن سان ٺاهيل ۽ سٺي حالت ۾ آهن ۽ اهي بندر جي دڪي تائين پهچن ٿيون.