2020-11-05
داخلا نمبر 1043
عنوان طالبان راڄ ۾ ڇوڪرين جا اسڪول بند
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1174
داخلا جو حوالو:
هن داخلا جون تصويرون نه مليون
طالبان راڄ ۾ ڇوڪرين جا اسڪول بند
اڃا ته افغانستان گهرو ويڙهه واري حالت ۾ آهي ۽ سالن کان اڏامندڙ امن جي پکيءَ کي ڪا شاخ نه ملي آهي، جو گهڙي سوا لاءِ پَرَ ساهي.هُتي وڻ سڙي رهيا آهن ۽ هوا ۾ پکين کان وڌيڪ گوليون ۽ راڪيٽ اڏامي رهيا آهن. ان بربادي ۽ بارود ۾ ڪي اسڪول به هلي رهيا هئا. اها ٻي ڳالهه آهي ته انهن مان اڪثر اسڪولن جي ڇت يا هڪ ڀت ڊٺل هوندي... پر طالبان مجاهدن قبضو ڪيل علائقن ۾ ڇوڪرين جا اسڪول بند ڪري 3000 ماسترياڻين سميت گهٽ ۾ گهٽ 75000 ڇوڪرين کي گهر ۾ ويهاري ڇڏيو. مسلمان ڀائرن کي، جيڪي پاڻ کي سڏائين ئي ”طالبان“ ٿا، اسلام جو اهو بنيادي سبق به وسري ويو ته علم حاصل ڪرڻ جي هدايت فقط ڇوڪرن کي ئي نه، ڇوڪرين کي به ڪئي وئي آهي. طالبان اتي مارشل لا هڻي ان کي ”اسلامي نظام“ ۽ ”شريعت“ قرار ڏنو آهي. خدا جي پناهه! خدا ۽ ان جي نبيءَ (صلعم) جو نالو کڻي هيڏو وڏو ڪوڙ ڳالهائڻ تي سندن دل نه ڏڪي! شايد انهن ڪوڙن جو ئي بدلو هجي جو افغانستان ۾ هيڏن سارن مولوي صاحبن جي هوندي به ڌرتي سالن کان بارود ۾ ڏڪي رهي آهي! اها ڌرتي شايد ان ڪري ڪجهه وڌيڪ ئي ڏڪي رهي آهي جو اتي اهي صاحب ڪوڙ ڳالهائي ۽ بي واجبي ڪري رهيا آهن جيڪي ڌرتيءَ جو گولو پنهنجن مضبوط يا ڪمزور ڪلهن تي کڻي بيٺا آهن.