ابڙو اڪيڊمي Abro Academy
2020-11-06
داخلا نمبر 1265
عنوان عالمي فورم ۾ پاڪستان جي پيشي!
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1102
داخلا جو حوالو:
هن داخلا جون تصويرون نه مليون
عالمي فورم ۾ پاڪستان جي پيشي!
پاڪستان جو سرڪاري وفد ان يقين سان جنيوا ۾ هلندڙ انساني حقن واري ڪميشن جي اجلاس ۾ شريڪ ٿيڻ لاءِ وڃي رهيو آهي ته اهو ”حڪومت پاڪستان خلاف ٿيندڙ هٿ ٺوڪي پروپيگنڊا جو عالمي سطح تي ڀرپور جواب ڏيڻ ۾ ڪامياب ويندو.“ اهو جواب ڏيڻ لاءِ سينيٽر تاج حيدر ۽ سنڌ جي وڏي وزير جو صلاحڪار ايڊووڪيٽ يوسف اڄ روانا ٿيڻا آهن ۽ ممڪن آهي ته پاڪستان جو پرڏيهي وزير سردار آصف پڻ ان اجلاس ۾ شريڪ ٿئي! صورتحال ڪجهه ان ريت آهي ڄڻ پاڪستان سرڪار پنهنجي دفاع ۾ صفائي پيش ڪرڻ لاءِ جنيوا وڃي رهي آهي.
ايئن ٿو لڳي ڄڻ ايم ڪيو ايم پاڪستان سرڪار جي خلاف ڪنهن عالمي عدالت ۾ ڪيس داخل ڪيو آهي، ايف آءِ آر ڪٽجي چڪي آهي ۽ پاڪستان سرڪار جوابدارن وانگر ان عدالت ۾ حاضر ٿي پنهنجي صفائيءَ ۾ ڳالهائڻ تي مجبور آهي. هيءَ ڪجهه نازڪ صورتحال اهي. ڇا جنيوا ۾ انساني حقن واري ڪميشن ۾ پاڪستاني وفد جي شرڪت کي ”حڪومت پاڪستان جو موقف“ پيش ڪرڻ جي حوالي سان ڏٺو وڃي؟ ڇا حڪومت پاڪستان ايم ڪيو ايم جي پروپيگنڊا ۾ ان حد تائين ”وٺجي“ چڪي آهي جو هاڻي اها جوابدارن وانگر ڪنهن عالمي عدالت جي ڪٽهڙي ۾ بيٺل آهي؟
حڪومت پاڪستان جو ملڪ ۾ ۽ عالمي سطح تي هر هنڌ اهو ئي موقف آهي ته ايم ڪيو ايم هڪ دهشتگرد تنظيم آهي. هڪ دهشتگرد تنظيم جي لڳايل الزامن جو جواب ڪنهن عالمي فورم ۾ ڏيڻ لاءِ حڪومت پاڪستان ڪيتري حد تائين ٻڌل آهي؟ جنيوا ۾ ايم ڪيو ايم جي الزامن جو جواب جيڪڏهن پاڪستان مان انساني حقن جي ڪا نمائنده تنظيم ڏئي ها ته ان جو مطلب هڪ هو پر جڏهن ساڳيو جواب حڪومت پاڪستان ڏئي ٿي ته ان جي معنيٰ ٻي آهي. ڇا هن ريت پاڪستان ايم ڪيو ايم کي ”دهشتگرد تنظيم“ کان گهٽ ڪا حيثيت ڪو نه ڏيئي رهيو آهي؟ جنهن صورت ۾ حڪومت پاڪستان، پاڪستان اندر ”دهشتگردن“ سان ڳالهيون نه ڪرڻ جو موقف رکي ٿي، ان صورت ۾ دهشتگردن جي الزامن جو عالمي سطح تي سرڪاري حيثيت ۾ جواب ڇا ٿو ظاهر ڪري؟
ايم ڪيو ايم پاڪستان جي خلاف انساني حقن جي ڀڃڪڙيءَ جو عالمي سطح تي جيڪو پرچار ڪيو آهي، ان هڻي هنڌ ڪيو آهي. يقينن ان زهريلي پرچار جي خلاف هر ان پليٽ فارم ۽ فورم تان مضبوط جواب ڏيڻ ضروري آهي جنهن کي ايم ڪيو ايم استعمال ڪيو آهي. يقينن هر هڪ ڪوڙ جو ٽوڙ پيش ڪرڻ ضروري آهي پر اهو جواب انساني حقن واري ڪنهن تنظيم پاران وڃڻ کپندو هو ۽ حڪومت لاءِ پاڪستان جو وقار ايئن داءَ تي لڳائڻ ضروري ڪو نه هو.
هاڻي جڏهن سرڪاري وفد دليل ڏيندو ۽ سرڪار پاران ثبوت پيش ڪندو ته ڇا ايم ڪيو ايم اهي جواب قبول ڪري وٺندي؟ قطعي نه، سندس واويلا اڃا وڌي ويندي ۽ سمورا سرڪاري دليل رد ٿيندا. جيڪڏهن حڪومت ايئن سمجهي ٿي ته هڪ فورم ۾ ڪجهه رڪارڊ، ڪجهه دليل ۽ ڪجهه ثبوت ڏيڻ سان انساني حقن واري ڪميشن مطمئن ٿي ويندي ۽ ”جنيوا عدالت“ ملزم کي باعزت بري ڪري ڪيس خارج ڪري ڇڏيندي، ته اها هڪ وڏي خوش فهمي ٿي سگهي ٿي. خود حڪومت پاڪستان ان ڳالهه جي قائل آهي ته اولهه جون طاقتون ٽين دنيا خاص ڪري پاڪستان ۾ انساني حقن جي ڀڃڪڙيءَ جو سوال زور شور سان اٿاري عالمي توڻي اوڀر واري مارڪيٽ ۾ سندن داخله بند ڪرڻ جي پروگرام تي عمل ڪري رهيو آهن.
هڪ طرف آمريڪي صدر ڪلنٽن جو قومي سلامتي وارو مشير انٿوني ليڪ ”آمريڪي مفادن جي لاءِ دنيا ۾ ڪٿي به فوجي مداخلت ڪرڻ جو حق“ جتائي ٿو ٻئي طرف اولهه جي سرپرستيءَ ۾ سرگرم انساني حقن جون ڪجهه تنظيمون ننڍن ملڪن ۾ دهشتگردن لاءِ ڇپر ڇانءَ بڻجي بيهن ٿيون. ان ماحول ۾ حڪومت کي کپندو هو ته دهشتگرد هٿان شڪار ٿيل عوام/ڌر کي پورو پورو موقعو ڏئي ها ته اهي دهشتگردن جي خلاف عالمي سطح تي ٺيڪ ٺيڪ جواب ڏين!
ايم ڪيو ايم جي دهشتگردن کي عالمي پليٽ فارم تي جواب ڏيڻ جي معنيٰ آهي کين عالمي سطح تي تسليم ڪرڻ. اصولي طور تي جڏهن حڪومت ايم ڪيو ايم کي دهشتگرد تنظيم سمجهي ٿي ته ان صورت ۾ ايم ڪيو ايم سان ڳالهيون ڪرڻ جو ڪهڙو جواز بچي ٿو؟ ڇا ڏوهارين سان به ڪي ڳالهيون ٿينديون آهن؟ ملڪ ۾ اندر ايم ڪيو ايم سان ڳالهيون هڪ جدا ڳالهه اهي، توڻي جو انساني حقن واريون تنظيمون ايم ڪيو ايم سان انهن ڳالهين کي به عالمي سطح تي بنياد بڻائينديون رهيون آهن ته جيڪڏهن ايم ڪيو ايم دهشتگرد تنظيم اهي ته پوءَ حڪومت انهن سان ڳالهائي ڇو ٿي؟ هن وقت يقينن ايم ڪيو ايم حڪومت کي عالمي سطح تي سوڙهو ڪري ڇڏيو آهي جو پاڪستان جوابدارن وانگر ”جنيوا عدالت“ ۾ وڃي بيٺو آهي. پاڪستان جي 5 هزار کن عوام جي قاتل ڌر پاران فريادي طور ڪيس داخل ڪري انساني حقن واري ڪميشن نه رڳو پاڪستان جي عوام جي توهين ڪئي آهي پر خود پاڪستان ۾ دهشتگردن هٿان يرغمال بڻيل ماڻهن جو ڪيس ڪمزور ڪرڻ ۾ قاتلن جو ساٿ ڏيئي رهي آهي. ڇا ان جو احساس اقوام متحده کي آهي؟