علي حسن چانڊيو

�اري تقريب ۾ سندس ملاقات ڊاڪٽر سان ٿي، هو اتي خاص مهمان جي حيثيت سان آيو هو. 1987 ۾ ڊاڪٽر سان هن جي هڪ تفصيلي ڪچهري ٿي هئي جنهن ۾ عزيز ڪينجهرائي ۽ ڊاڪٽر طالب لاشاري به شامل ٿيا هئا. 1988 وارن واقعن کان پوءِ علي حسن جو لاڙو ڊاڪٽر قادر مگسيءَ طرف ٿيو. هن کي ڊاڪٽر ۾ ڪهڙيون خوبيون نظر آيون؟ علي حسن ٽي خوبيون يا سبب ٻڌائي ٿو: 1ـ ان زماني ۾ تعليمي ادارن ۾ شاگرد تنظيمن جي غنڊه گردي هئي، ڊاڪٽر ان جي خلاف هو. 2 ـ تعليمي ادارن ۾ سڀني شاگرد تنظيمن کي سياست جو حق آهي، جيڪا ڳالهه ڊاڪٽر سڀني کان مڃائي. 3 ـ ڊاڪٽر قادر مگسيءَ سائين جي ايم سيد سان قومي ۽ طبقاتي جدوجهد جي ڳالهه تي اختلاف رکيا، ان جي مؤقف جي پذيرائي ٿي. پوءِ ’سنڌ ترقي پسند پارٽي‘ ٺهي، ۽ علي حسن ان ۾ شامل ٿي ويو.
1995 ۾ جڏهن ايم ڪيو ايم تي ڪراچيءَ ۾ فوجي آپريشن ٿيو، تڏهن شانتي نگر ۾ ترقي پسند هائوس تي به پوليس ۽ رينجر چڙهائي ڪئي. علي حسن به گرفتار ٿيو. سندس اکين تي لڳاتار 20 ڏينهن پٽي ٻڌل هئي، ۽ ڪنهن کي به پتو ڪونه هو ته هو ڪٿي آهي؟ پوءِ پتو پيو ته اهو هاڻوڪو گلزار هجري ٿاڻو هو، جيڪو سهراب ڳوٺ جي پٺاڻ قبضه مافيا کان ڇڏائي ڪئمپ ۾ بدلايو ويو هو. هي عبدالله شاهه جو دور هو. علي حسن جو خيال آهي ته اهو پيپلز پارٽي جي مخالفت جو نتيجو هو.
نيٺ، علي حسن ڇا ٿو چاهي؟ ۽ ڇوٽڪاري جو رستو ڪهڙو آهي؟ علي حسن جي خيال ۾ ”ڇڙواڳ ٽولا سنڌ جو مستقبل ٺاهي نٿا سگهن، منظم تنظيمون انقلابي جذبي سان ڪا تبديلي آڻي سگهن ٿيون.“ هن وقت علي حسن چانڊيو ”سنڌ ترقي پسند پارٽي“ جو مرڪزي ڪميٽي ميمبر ۽ نظرياتي شعبي جو سربراهه آهي.
(پهرين مئي 2010, ڪراچي)

علي حسن بعد ۾ سنڌ ترقي پسند پارٽي به ڇڏي. پڪ سان ڪي اختلاف ٿيا هوندس. هن هڪ جدا پارٽي ٺاهي، ’سنڌ نيشنل موومينٽ‘ پر سندس پراڻيون جسماني تڪليفون اٿلي پيون ... ۽ جلد 24 جولاءِ 2913 تي گذاري ويو.
(31 مارچ، 2014)