عوام ايٽم بم، ڪرائيم بم، ٽائيم بم ۽ ٽئڪس بم برداشت ڪري وٺندو آهي!

�ن بي ڍنگائيءَ سان (ان ۾ عوام جو ڪو بہ ڏوھہ ڪو نہ آهي)، هاڻي وري جناب چيف ايگزيڪيوٽو عوام کان راءِ وٺڻ جي صلاح ڏني آهي تہ سي ٽي بي ٽي تي صحيحون ڪيون يا نہ ڪيون؟ عوام ايترو ڄٽ ناهي جيترو ان کي سمجهيو وڃي ٿو. هر ڪو سمجهي ٿو تہ بادشاھہ سلامت فيصلو ڪري ڇڏيو آهي پر ميار لاهڻ خاطر عوام جي راءِ ۽ رد عمل ڏسڻ ٿا چاهين! سرڪار توهان ڪو چڱو فيصلو ڪرڻ مهل محتاط ڇو پيا ٿيو؟ توهان عوام کان پڇي تہ حڪومت ۾ ڪو نہ آيا هئا ۽ نہ وري عوامي پارليامينٽ جا دروازا کولڻ جي پوزيشن ۾ آهيو. توهان وٽ پنھنجي ”ٿنڪ ٽئنڪ“ آهي. ان کان پڇو ۽ سڄو ڪريڊٽ ان کي ڏيو: عوام کي ڇڏيو تہ وڃي پنھنجو ڪاروهنوار ڪري.

عوام جي راءِ کي عزت هجي ها تہ اڄ پاڪستان جو اقتصادي نقشو ڪو ٻيو هجي ها ۽ پرڏيھي پاليسي گهڻي بھتر هجي ها! توهان بسم الله پڙهي سي ٽي بي ٽي وارو فيصلو ٻڌائي ڇڏيو ۽ عوام جي ڪلهي تي بندوق نہ رکو. توهان فوجي ماڻهو آهيو، جوانمرديءَ سان فيصلا ڪيو! توهان جوانمردي سان فيصلا ڪيو، عوام جوانمرديءَ سان پنھنجو جگر کائي رهيو آهي. پاڪستان جو عوام شينھن شير خدا جو آهي. ڀٽائي صاحب چيو آهي تہ ”ڪتو ڪرٽي هڏيون، جوانمرد جگر کائي! سو، پريشان نہ ٿيو، پاڪستاني عوام هڏيون ڪو نہ ڪرٽيندو آهي. ايٽم بم کان ڪرائي بم ۽ ٽائيم بم کان ٽيڪس بم سڀ ڪجھہ جوانمرديءَ سان سهي ويندو آهي. ”سي ٽي بي ٽي“ تہ معمولي ڪيس آهي! آئون مڃان ٿو تہ سي ٽي بي ٽي جو تعلق عوام سان آهي پر جيئن تہ عوام ”غير مختيارڪار“ آهي ۽ هن کي ڪنھن بہ ٻئي فيصلي ۾ نہ شريڪ ڪيو ويو آهي نہ پڇيو ويو آهي. فقط اطلاع ڏنو ويو آهي، ان ڪري هاڻي بہ عوام کي ڪنھن گناھہ ثواب ۾ شريڪ نہ ڪيو. جيڪڏهن شريڪ ڪرڻو آهي تہ پوءِ ٺيڪ طرح سان ۽ مڪمل طرح سان ڪيو نہ تہ الله حافظ! عوام کان پڇندؤ تہ عوام فقط هڪ سوال پڇندو، ”جناب! اسان جي جند ڪڏهن ڇٽندي؟ ڇٽندي بہ يا ڪو نہ؟ ڇا سنڌ باد جهازيءَ وارو جنڙو اسان جي پٺن تي سوار ٿي چڪو آهي ۽ مرڻ گهڙيءَ تائين جند ڪو نہ ڇڏيندو؟