ابڙو اڪيڊمي Abro Academy
2020-11-06
داخلا نمبر 1196
عنوان عورت ”اڌوري“ پر ووٽ ”پورو“
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1118
داخلا جو حوالو:
هن داخلا جون تصويرون نه مليون
19 جنوري 1996ع
عورت ”اڌوري“ پر ووٽ ”پورو“
هاڻي پاڪستان جو آئين ڇٽو، سينيٽ ۾ ويٺل مخالف ڌر جو اڳواڻ راجا ظفرالحق عورت جي حڪمرانيءَ تي پاڪستان جي عورتن کان ريفرينڊم جي ذريعي فيصلو وٺڻ جي ڳالهه ڪري ٿو. سندس دعوا آهي ته 90 سيڪڙو عورتون بينظير ڀٽو جي خلاف ووٽ ڏينديون. اها ئي لائين ان مهل به اختيار ڪئي وئي هئي جڏهن محترمه فاطمه جناح ايوب خان جي خلاف اليڪشن ۾ بيٺي هئي. اها ڳالهه سمجهه کان ٻاهر آهي ته ”عقل ڪل“ جي دعوا ڪندڙ اڪابرن جي وجود ۾ عورت جي خلاف ايڏي چڙ ڇو آهي؟
پهرين ڳالهه ته اها دعوا ئي عجيب آهي ته 90 سيڪڙو عورتون ڪنهن عورت جي حڪمرانيءَ جي مخالفت ڪنديون. جيڪڏهن ايئن هجي ها ته بينظير ڀٽو ٻه ڀيرا وزيراعظم ڪو نه هئي ها. ٻي ڳالهه ته پاڪستان جي سڀ کان مٿاهين ايوان ۾ عورت ۽ مرد جي بنياد تي حاڪميت جو سوال اٿاري عورت جي مخالفت ڪرڻ سان خود مخالف ڌر جي اڳواڻ جي ذهني حالت ۽ سياسي معتبريءَ جي پويان اصلي قد بت جي خبر پئجي وئي آهي. تنقيد ٿي ڪجي ته استحقاق ٿو مجروح ٿئي پر ايڏانهن ڌيان ئي نٿو ڏنو وڃي ته ڪيڏيون بي دليل ڳالهيون ڪهڙي فورم ۾ چيون وڃين ٿيون!
هن وقت مسلم ليگ سرمائيدارن جي نمائندگي ڪندڙ پارٽي آهي ۽ انهن جي ڦٽڪار سنڌ جي وڏيرن تي اهي ته اها دقيانوسي مخلوق پيپلز پارٽي سان گڏ آهي. پر، عورت جي حڪمرانيءَ جي مخالفت جنهن طبقي ڪئي آهي اهو ته پاڻ کي روشن خيال سمجهي ٿو، ان ڪهڙيءَ طرح ههڙي قيانوسي ڳالهه ڪئي؟ سنڌ يا پنجاب، سرحد يا بلوچستان جي زرعي ۽ قبائلي سماج ۾ عورت جي سماجي آزادي ۽ ان تي مرد جي جبر جا سوال پنهنجي جاءِ تي پر زرعي سماج ۾ عورت جو احترام بهرحال، صنعتي سماج کان وڌيڪ آهي. اهو هڪ جدا ۽ ڊگهو بحث آهي ۽ ڪنهن ٻئي وقت لاءِ ڇڏجي ٿو.
مسلم ليگ جي ذهين، اڪابر ۽ روشن خيال قيادت کان اهو سوال ضرور پڇي سگهجي ٿو ته ڇا توهان عورت کي ڪمزور ٿا سمجهو؟ جيڪڏهن ايئن نه آهي ته پوءِ توهان هڪ عورت کي هٽائڻ لاءِ جيڪو ننهن چوٽيءَ جو زور لڳايو آهي، اهو اجايو ڇو ويو آهي؟ ڇا توهان کي عورت جي عقل، سمجهه، حوصلي ۽ جرئت تي شڪ آهي؟ توهان ڪهڙي بنياد تي عورت کي معاشري ۾ ”اڌورو“ سمجهو ٿا جڏهن ته سندس ئي ووٽ کي ”پورو“ قبول ڪيو ٿا. اهو ڪيڏو نه عجيب تضاد آهي! عورت جو ووٽ ملي ٿو ان ڪري ”مڪمل“ اهي پر جڏهن عورت کي حڪومت ملي ٿي ته اها ”اڌوري“ بڻجي وڃي ٿي. ڳالهه ڪجهه به نه آهي، ڳالهه رڳو اها آهي ته بينظير ڀٽو حڪومت کي هٽائڻ لاءِ هر قسم جو دليل هلايو پيو وڃي پوءِ کڻي اهو وزنائتو هجي يا بنهه بي وزن.