ابڙو اڪيڊمي Abro Academy
2020-11-04
داخلا نمبر 895
عنوان قدرتي ڪُونر/جوالائي سرگرمي
شاخ منڇر گورک گاج دنيا
پڙهيو ويو 1146
داخلا جو حوالو:
هن داخلا جون تصويرون نه مليون
قدرتي ڪُونر/جوالائي سرگرمي
1999 ڌاري روڊ پوڻ کان پوءِ ور وڪڙ نه رهيا آهن. اسان وقت جي غلط اندازي سبب انهن کان اڳتي نڪري وياسين. سامهون ٻنڌڻي نظر آئي ته اسان موٽ کاڌي. هي قدرتي ڪونر جهانگارن کان ڪرچات ويندي، ٻنڌڻي کان 3 ڪلوميٽر اورتي رستي جي سڄي پاسي آهن. يعني هي ٽي چار گول دائرا آهن. جيئن ڪنهن ٻڙڪندڙ گپ کي ڪنارا ٻڌجن يا وري جيئن رازا گارو ٺاهڻ مهل گاري جي چوڌاري گول ٻنو ٺاهيندا آهن يا وري جيئن مال جي چاري لاءِ ڪونر هجن. هيءَ پٿريلي فارميشن سنڌ ۾ جوڙجڪ جي لحاظ کان في الحال اڪيلي دريافت آهي. مون کي ”ههڙا نشان هن علائقي ۾ ٻيا به هئڻ گهرجن!“ مون بخاري صاحب سان خيال ونڊيو. ” مون کي پڪ آهي ته اهڙا ٻيا نشان به موجود هوندا.“ ”بلڪل آهن،“ مقامي رند ٻروچ خبر ڏني، ”هلو ته ڏيکاريانو!“ ان سان پڪ ٿي ته لڪيءَ ۾ جوالائي سرگرميءَ جون ٻيون نشانيون به آهن. لڪي سلسلي ۾ هڪ ثابتي، ”جوالائي خاڪ“ آهي جيڪا رني ڪوٽ ويجهو هڪ ڍوري ۾ ڏسجي ٿي. ٻيو ماڳ سيوهڻ، ڄامشورو انڊس هاءِ وي کان اولهه ۾ ’ٻاڙو ڍورو‘ فارميشن آهي. هنن قدرتي ڪونرن جي گولائي ڪا وڏي نه آهي، اهي عام ڪونرن جيترا ۽ هيٺانهان آهن. ائين ٿو لڳي ته ڪنهن وقت زميني لاوا جو ٿورڙو مقدار اتان زمين مان ٽن چئن جاين تان ٻڙڪي نڪتو آهي، ڪجهه وهيو به آهي ۽ پوءِ هوريان هوريان ٺري ويو آهي. انهن جوالائي ڪونرن جو اندريون چن پٿر ۽ ان مان اڀامي وهي نڪتل گهري رنگ جو جوالائي مادو صاف ڏسجي ٿو، اهي ڪونر زمين کان فٽ ڏيڍ اڀريل آهن ۽ انهن جو قطر چئن کان اٺ فٽ آهي. هاڻي، هيءَ فارميشن لڪي جبل ۾ جوالائي سرگرميءَ تي وڌيڪ تحقيق لاءِ ارضيات جي ماهرن ڏانهن نهاري رهي آهي.