قلندر شهباز جو مقبرو

قلندر شهباز جو مقبرو
قلندر جي مقبري جي پنهنجي تاريخ آهي. مختلف دور مختلف حاڪمن جي عقيدتمندي ۽ مفادن کي ظاهر ڪن ٿا. سن 2002 عيسويءَ ۾ قلند رجو 750 هون عرس ملهايو ويو. ان عرصي کان 6 سال اڳ يعني 13 جولاءِ 1994ع تي قلندر جي مزار جي گنبذ جو اولهه ڏکڻ وارو اڌ ڊهي پيو هو. اها 15 صفر هئي ۽ شاهه عبدالطيف ڀٽائيءَ جي ميلي جي ٻي ڌمال هئي. گنبذ ڊهڻ جي خبر سڄي سنڌ ۾ جهنگ جي باهه وانگر پکڙي هئي. جيڪي دهريا هئا سي دل ۾ مُرڪيا پئي ۽ چيائون پئي ”قلندر پنهنجو قبو به بچائي ڪونه سگهيو!“ البت جيڪي معتقد هئا تن ٿي چيو، ”قيامت اچڻ تي آهي!“
جيڪي به ٿيو ۽ جيڪي به سوچيو ويو پر اسان هاڻي ڏسون پيا ته قلندر جو مقبرو نئين سر تعمير ٿيو، ڪشادو ۽ سهڻو ٿيو. اڳي سوڙهه ۽ اونداهي هئي، هاڻي ڪشادگي ۽ روشني آهي. هيءَ درگاهه جنرل ايوب خان جي زماني کان اوقاف کاتي جي حوالي ٿي. 14 آڪٽوبر 1960ع کان اوقاف کاتو زائرين جي نذراني جو مالڪ بڻيو پر مقبري جي حفاظت ۽ مرمت ڪونه ٿي.
قلندر جو مقبرو سڀ کان پهرين سلطان فيروز تغلق جي ڏينهن ۾ سيوهڻ جي گورنر اختيارالدين سن 757هه ۾ تعمير ڪرايو جنهن ۾ ست ونگون هيون. ان کان پوءِ شهنشاهه اڪبر جي ڏينهن ۾ ان جي توسيع ٿي. اهو ڪم مرزا جاني بيگ ۽ سندس پٽ مرزا غازي بيگ ڪرايو. شاهجهان جي ڏينهن ۾ مقبري جي ويجهو ٻه مسجدون تعمير ٿيون ۽ صحن ۾ پٿرن جو فرش وڇايو ويو. سن 1173هه ۾ ميان غلام شاهه ڪلهوڙي هڪ وڏو شاهي عَلم ۽ ڪاٺ جا ٻه وڏا دروازا لڳايا، يا مناسب مرمت ڪرائي. مقبري ۾ ڪاشيءَ جو ڪم ديندار خان جي ڏينهن ۾ ٿيو ۽ ڪٽهڙي جي ڇٽيءَ جي مٿان چانديءَ جو ڪم محبوب علي وڳڻ ڪرايو. ان زميندار مخدوم بلاول شهيد جي مسجد به تعيمر ڪرائي هئي. درگاهه جي ڏکڻ وارو سونو دروازو ذوالفقار علي ڀٽي وجهرايو هو (حضرت سيد عثمان قلندر، تاج صحرائي، قلندر لعل شهباز سووينيئر6)،