قوم ڪرڪيٽ ڏسي..... ايم ڪيو ايم پنهنجو ڪم ڪري!

2 مارچ 1996ع
قوم ڪرڪيٽ ڏسي..... ايم ڪيو ايم پنهنجو ڪم ڪري!

ڪنهن صحيح چيو آهي ته پاڪستان وارا راند ايئن ڪندا آهن ڄڻ جنگ هجي ۽ جنگ ايئن ڪندا آهن ڄڻ راند هجي! 29 فيبروري 96ع تي ڪرڪيٽ جي ميدان ۾ ڏکڻ آفريڪا کان پاڪستان جي هار کانپوءِ سڄي قوم ايڏي اداس هئي جو ايڏو ڏک پاڪستان واسين کي ان مهل به ڪو نه ٿيو هو جڏهن اوڀر پاڪستان ۾ جنرل نيازيءَ هٿيار ڦٽا ڪيا هئا! ورلڊ ڪپ ۾ کيڏندڙ اهي ئي پاڪستاني رانديگر جيڪڏهن ڏکڻ آفريڪا کان کٽن ها ته ملڪ ۾ وڏو جشن ٿئي ها ۽ ”ڪرڪيٽ بخار“ اڃا ٻه ٽي ڊگريون وڌي وڃي ها پر هاڻي ڏٺو ويو آهي ته ”بخار“ گهٽجي نارمل ڊگرين کي اچي ويجهو پيو آهي ۽ پاڪستان جي ٽيم تي اهڙا اهڙا الزام لڳي رهيا آهن جهڙا 1971ع کانپوءِ بنگله ديش ٺهڻ بعد پاڪستاني سياستدانن ۽ فوجي جنرلن تي لڳا هئا!
وزيراعظم هن مهيني ۾ فقط ” ڪرڪيٽ“ جي موڊ ۾ آهي پر مخالف ڌر وڏي سياست جي موڊ ۾ آهي. گڏيل قومن جو هڪ عيوضي يا سندس ٽيم ڪراچي پهتي آهي. اها ٽيم ڪرڪيٽ مئچن جو نه، ڪراچيءَ جي حالتن جو جائزو وٺڻ آئي آهي. گڏيل قومن جي انساني حقن واري ڪميشن جو عيوضي نائجل راڊلي ان سوال جو جائزو وٺندو ته پوليس جي تحويل ۾ غير قانوني قلتن ۽ رياستي دهشتگرديءَ وارا الزام ڪيتري حد تائين سچا يا ڪوڙا آهن؟
نائجل راڊلي حڪومت پاڪستان جي دعوت تي ڪراچي ڪو نه پهتو آهي، اها خبر وائس آف آمريڪا به نشر ڪئي ته عيوضي پاڪستان پهچي چڪو آهي پر سنڌ سرڪار جي اهم وزير سيد پرويز علي شاهه ان کان لاعلمي ظاهر ڪئي. ظاهر آهي ته گڏيل قومن جو اهو وفد ايم ڪيو ايم جي واويلا ۽ ڪوششن سان ڪراچي پهتو آهي. مسٽر راڊلي پوليس تحويل ۾ موتن بابت رپورٽون تيار ڪرڻ لاءِ سرڪار ۽ مخالف ڌر جي تنظيمن سان ملندو. هي سٽون ڇپجڻ تائين راڊلي ڪراچيءَ ۾ ايم ڪيو ايم جي وفد کان بريفنگ وٺي چڪو هوندو. پاڪستان جي سياسي ڌربندي هن وقت ڪجهه ان ريت آهي ته هڪ طرف حڪومت پنهنجي ”دفاع“ ۾ اڪيلي بيٺي آهي جنهن کي ٿورو گهڻو قومپرستن جو اخلاقي ۽ زباني ساٿ آهي جڏهن ته ٻئي پاسي سڄي مخالف ڌر جا سڀ لهجا ۽ رنگ بنا ڪنهن رنگ و نسل جي فرق جي، سرگرم آهن. حڪومت مارچ جي مهيني کي ڪرڪيٽ جي حد تائين محدود رکڻ جي ڪوشش ۾ آهي پر ايم ڪيو ايم، مسلم ليگ ۽ عوامي نيشنل پارٽي ڪنهن ٻي پچ تي ڪا ٻي ڪرڪيٽ کيڏڻ جون تياريون ڪري رهيون آهن. ڪراچيءَ جي صورتحال تي گڏيل قومن جو عيوضي پنهنجي رپورٽ تيار ڪرڻ پهتو آهي ته اها عالمي سطح تي ايم ڪيو ايم جي هڪ وڏي ڪاميابي چئبي.
پاڪستاني ڪرڪيٽ ٽيم جو ڪپتان وسيم اڪيم اسان کان چڱو آهي جيڪو خود تنقيد ڪري ٿو ته ”ڏکڻ آفريڪا اسان کي آئوٽ ڪلاس ڪري ڇڏيو!“ پر اسان مان ڪير آهي جيڪو مڃيندو هجي ته دهشتگرد عالمي سطح تي پاڻ کي مظلوم ثابت ڪرائڻ واري مهم ۾ حڪومت پاڪستان، حڪومت سنڌ، حقيقي جمهوريت پسندن ۽ قومپرستن کي آئوٽ ڪلاس ڪري ڇڏيو آهي، حد اها آهي ته دهشتگرد ڌر جو هڪ اڳواڻ روزانو وڏي واڪ چوي ٿو ته، ”مهاجرن کي حق نه مليا ته حڪمراني ۽ سنڌ جي جاگرافي تبديل ٿيندي!..... جون مهيني تائين حق نه مليا ته لياقت آباد مان جبوبي صوبه سنڌ جي تحريڪ شروع ٿيندي“! انهن اڳرن ۽ اڳرائيءَ وارن جنوني بيانن جي موٽ ۾ وفاقي وزير تعليم صرف ايترو چوي ٿو ته ”پيپلز پارٽي سنڌ جو ورهاڱو ٿيڻ نه ڏيندي!“ اصل ۾ سنڌ جي خلاف هڪ جارحاڻو حملو شروع ٿي چڪو آهي ۽ هن وقت ان جنگ ۾ مختلف پاسن کان دٻاءُ به جاري آهي پر ان حملي خلاف جوابي رٿابنديءَ جي اها نوعيت ڏسڻ ۾ نٿي اچي، جيڪا هئڻ گهرجي.
اسان اڃا تائين جنگ کي به راند سمجهي رهيا آهيون ۽ پنهنجيون اکيون ڪرڪيٽ راند جي ميدان ۾ وجهي سمجهون پيا ته پوئتي ڪا جنگ آهي ئي ڪو نه، جيڪڏهن آهي به ته مڙئي خيرآهي ڇاڪاڻ ته وفاقي وزير تعليم چئي ڇڏيو آهي ته ”پيپلز پارٽي سنڌ جو ورهاڱو ٿيڻ نه ڏيندي!“ قوم ۽ حڪومت گڏجي ڪرڪيٽ ملهائي رهيا آهن ۽ سرحدن جي اندر گهڙي آيل غير ملڪي مفاد پاڪستان ۾ امن امان ۽ تحويل ۾ ٿيل موتن جو ڪيس تيار ڪرائڻ ۾ گڏيل قومن جي عيوضيءَ جي مدد ۾ مصروف آهن.