لائٽورينڪَس رِجوائي

لائٽورينڪَس رِجوائي / Lytorhynchus ridgewayi /

ڪولوبريناءِ جنس ۾ شامل هيءَ ننڍڙي بلا 0.4 ميٽر کان 0.45 ميٽر (وڌ ۾ وڌ ڏيڍ فٽ) ڊگهي ۽ پڇ 75 کان 80 ميٽر ٿئيس ٿو. ان جو جسم هلڪو ڀورو هوندو آهي، جنهن تي ڪارين ڪنارين وارا چِٽ قطار ۾ هوندا آهن. ٻنهي پاسي غير نمايان ننڍا چِٽ هوندا آهن. مٿي تي هڪ وڏو چِٽ هوندو اٿس، جنهن جا پاسا اکين طرف وات تائين ويندا آهن.
لائٽوريڪَس جنس جي بلا وارياسن علائقن جي ننڍڙين بلائن تي مشتمل آهي. انهن جون منڍيون سوڙهيون ۽ ڊگهيون هونديون آهن ۽ ٻوٿ نمايان طور ڊگهو هوندو آهي. جسم سنهو، نرم ۽ چمڪندڙ ڇلرن سان ڍڪيل ٿئي ٿو ۽ واريءَ ۾ سولائيءَ سان رستو ٺاهي اندر ئي اندر هلي سگهي ٿي. هيءَ بلا واريءَ ۾ رهڻ لاءِ پوريءَ طرح مؤزون آهي.
هيءَ بلا واريءَ جي نرم دڙن بدران ڇڊي نباتات واري نرم مٽيءَ ۾ رهندي آهي. رات جو شڪار ڪندي آهي، جيت ماڪوڙا ۽ ڪِرڙيون کائيندي آهي. ڪرڙين جو شڪار ڪرڻ وقت انهن کي جسم ۾ وڪوڙي کائي ويندي آهي. تمام خائف آهي. خطري وقت پنهنجو جسم بال وانگر گول ويڙهي ڇڏيندي آهي ۽ منڍي وچ ۾ لڪائي ڇڏيندي آهي. پڪڙجڻ کان پوءِ به چڪ وجهڻ جي ڪوشش نه ٿي ڪري.
هن جنس جو بلائون مارچ کان مئي دوران ٻه چار ڊگهڙا آنا ڏينديون آهن، جيڪي چپچپي مادي سان ڳنڍيل ٿين ٿيون. آنا 35 ملي ميٽر ڊگها ٿين ٿا ۽ 9 ملي ميٽر گولائيءَ ۾ هوند آهن.